មេ​បញ្ជា​ការ​កងទ័ព​ជើង​គោក​ ៖ គោល​នយោ​បាយ​ការពារ​ជាតិ​របស់​កម្ពុជា​ គឺ​ធ្វើ​ឱ្យ​មាន​សន្តិភាព​ស្ថិត​ស្ថេរ​យូរអង្វែង​ និង​កសាង​ឱកាស​សម្រាប់​ការ​អភិវឌ្ឍ​ជាតិ​

ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេរមភូមិន្ទ មេបញ្ជាការ​កងទ័ពជើងគោក បាន​លើក​ឡើងថា គោលដៅសំខាន់ចំនួនពីរ នៃគោលនយោបាយ​ការពារជាតិ​របស់ រាជរដ្ឋាភិបាលកម្ពុជា គឺការ​ធ្វើឱ្យ​មាន​សន្តិភាព​ស្ថិតស្ថេរយូរអង្វែង និងការកសាងឱកាសសម្រាប់ ការអភិវឌ្ឍជាតិ។ ឯកឧត្តម ឧត្តមសេនីយ៍ឯក ក្នុងពិធី​បូក​សរុប​លទ្ធផល​ការ​ងារ​យោធា សន្តិសុខ ឆ្នាំ២០១៩ និងផ្សព្វផ្សាយផែនការសកម្មភាពការងារយោធា សន្តិសុខ ឆ្នាំ២០២០ របស់យោធ​ភូមិ​ភាគ​ទី៣ កាលពីថ្ងៃទី២០ ខែកុម្ភៈ ឆ្នាំ២០២០ នៅខេត្តកំពង់ស្ពឺ។

ឯកឧត្តម ឧត្តមសេនីយ៍ឯក បន្ថែមថា សន្ថិភាព ស្ថិរភាពនយោបាយ និងការរីកលូតលាស់ផ្នែកសេដ្ឋកិច្ច ដែល​កម្ពុជា​កំពុង​មាន​ក្នុង​ពេលបច្ចុប្បន្ន កំពុងផ្តល់នូវឱកាសដ៏ប្រពៃសម្រាប់ការកសាង និងអភិវឌ្ឍ សមត្ថភាព កងយោធពលខេមរភូមិន្ទ។ ដូច្នេះ កង​យោ​ធពលខេមរភូមិន្ទ ផ្ទាល់ត្រូវបន្តជំរុញផងដែរ នូវការកែទម្រង់របស់ខ្លួន ដើម្បីឆ្លើយតបឱ្យមានប្រសិទ្ធភាព និងដើរ​ទាន់សន្ទុះ​ថ្មីនៃ​ស្ថានភាព អំណោយផលនេះ។

ជាមួយគ្នានេះ ឯកឧត្តម ឧត្តមសេនីយ៍ឯក ក៏បានកោតសរសើរ និងវាយតម្លៃខ្ពស់ ចំពោះកិច្ចខិតខំ ប្រឹង ប្រែងរបស់ថ្នាក់ដឹកនាំ នាយទាហាន នាយទាហានរង និងពលទាហានទាំងអស់ របស់យោធភូមិ ភាគទី៣ ក៏ដូចជាគ្រប់បណ្តាកងឯកភាពចំណុះ នៅ​ក្នុង​ការ​បំពេញភារកិច្ចថែរក្សាការពារសុខសន្តិភាព ស្ថិរភាព និងការការពារបូរណទឹកដីក៏ដូចជាការចូលរួមចំណែក​នៅក្នុង​កា​រ​ជួយ​សង្គ្រោះប្រជាពលរដ្ឋ នៅពេលជួបគ្រោះមហន្តរាយធម្មជាតិផងដែរ៕


ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង