កំពង់ឆ្នាំង ៖ឆ្នាំនេះខេត្តកំពង់ឆ្នាំងមានទូកចំនួន២៦ ទៅចូលរួមអុំ និងចែវប្រណាំង នៅក្នុងព្រះរាជពិធីបុណ្យអុំទូក បណ្តែតប្រទីប អកអំបុកនិងសំពះព្រះខែនៅរាជធានីភ្នំពេញ ដែលនឹងប្រព្រឹតទៅ នៅថ្ងៃទី១៤ដល់ថ្ងៃទី១៦ ខែវិច្ឆិកា ឆ្នាំ២០២៤ ។
មុនពេលចេញដំណើរទៅកាន់រាជធានីភ្នំពេញ អាជ្ញាធរខេត្តកំពង់ឆ្នាំង បានរៀបចំធ្វើពិធីសំណេះសំណាលជាមួយកីឡាករកី ឡាការនីចំណុះទូក ទាំងអស់ នៅវត្តកំពង់ត្រឡាចក្រោម ស្រុកកំពង់ត្រឡាច នាព្រឹកថ្ងៃទី១២ខែវិច្ឆិកា ឆ្នាំ២០២៤ ។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានអោយដឹងថា ឆ្នាំនេះខេត្តកំពង់ឆ្នាំង បានបញ្ជូនទូកអុំ ទូកចែវ ចំនួន២៦ទូក ឲ្យទៅចូលរួម អុំនិងចែវប្រណាំង ក្នុងព្រះរាជពិធីបុណ្យអុំទូក បណ្តែតប្រទីប អកអំបុក សំពះព្រះខែ នៅខាងមុខព្រះបរមរាជវាំង រាជធានីភ្នំពេញ ។ក្នុងនោះទូកចែវបុរសចំនួន១៥ទូក,ទូកចែវនារី១ទូក,ទូកអុំបុរសខ្នាតអន្តរជាតិចំនួន៨ទូក,ទូកអុំបុរសខ្នាតវែងចំនួន១ទូកនិងទូកអុំនារីខ្នាតវែងចំនួន១ទូក ដែលទូកទាំង
នេះមកពីក្រុង ស្រុកចំនួន៦ និង មានកីឡាករ កីឡាការនីសរុបចំនួន១ ៥១៦នាក់ ស្រីចំនួន១១៥នាក់។
ឯកឧត្តម អភិបាលខេត្ត បានបញ្ជាក់ទៀតថា ខេត្តកំពង់ឆ្នាំង ចាប់ផ្តើមបញ្ជូនទូកចែវ ទូកអុំ ទៅចូលរួមប្រណាំង ក្នុងព្រះរាជពិធីបុណ្យអុំទូក ចាប់តាំងពីឆ្នាំ១៩៩១មកម្ល៉េះ ក្នុងពេលរាជរដ្ឋាភិបាល កម្ពុជាបានរៀបចំព្រះរាជពិធីបុណ្យអុំទូកបណ្តែតប្រទីបជាលើកដំបូងមកម្លេះ ។ ហើយ រាល់ពេលប្រកួត កីឡាករ កីឡាការិនីខេត្តកំពង់ឆ្នាំង តែងតែនាំមកវិញនូវពានរង្វាន់ជ័យលាភី ជូនខេត្តជាច្រើនផងដែរ ។
មានប្រសាសន៍សំណេះសំណាលជាមួយកីឡាករ កីឡាការនីនាពេលនោះ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង បានបញ្ជាក់ថា ពិធីបុណ្យប្រអុំទូក បណ្តែតប្រទីប អកអំបុក និង សំពះព្រះខែ តែងត្រូវបានរៀបចំឡើងជារៀងរាល់ឆ្នាំ ។ ការប្រណាំងទូក មានរយះពេល៣ថ្ងៃ គឺចាប់ពី ថ្ងៃ១៤,១៥កើត ដល់ថ្ងៃ ១រោចខែកក្តិក ហើយពេលយប់ក៏មានការបណ្តែតប្រទីបផងដែរ។
ការប្រារព្ធពិធីបុណ្យនេះឡើង ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹករបស់ខ្មែរ ដែលបានរំដោះទឹកដីពីខ្មាំងសត្រូវ ។ ពិធីបុណ្យអុំទូកនេះ ក៏បានភ្ជាប់នឹងពិធីផ្សេងៗទៀតផងដែរ គឺការបណ្ដែតប្រទីប អកអំបុក និងសំពះព្រះខែ ដែលជាការឆ្លុះបញ្ចាំងពីជំនឿសាសនាយ៉ាងមុតមាំ។
ឯកឧត្តម បណ្ឌិតសភាចារ្យ បានផ្តាំផ្ញើដល់កីឡាក កីឡាការនីទាំងអស់ ត្រូវខិតខំយកអស់ពីកម្លាំងកាយ កម្លាំងចិត្ត អនុវត្តឲ្យបានម៉ឺងម៉ាត់ តាមបទបញ្ជារបស់គណកម្មការបច្ចេកទេស ដោយរក្សាបាននូវសីលធម៌ គុណធម៌ សុជីវធម៌ ឲ្យសក្តិសមជាកីឡាករ និង ត្រូវរក្សាទំនាក់ទំនងល្អ សាមគ្គីភាពគ្នា និងត្រូវចេះថែទាំសុខភាព ៕
