ខេត្តកំពង់ឆ្នាំង គ្រោងរៀបចំសាងសង់សួនច្បារសាធារណៈ នៅតាមដងទន្លេប្រវែងប្រមាណ១៦គីឡូម៉ែត្រ ដោយគម្រោងនេះអាចនឹងចាប់ផ្តើមយ៉ាងយូរនៅឆ្នាំ២០២៥ខាងមុខ ពោលគឺក្រោយពីបញ្ចប់កិច្ចការធ្វើផ្លូវបេតុងគ្រប់ផ្លូវទាំងអស់នៅក្នុងភូមិសាស្ត្រក្រុងកំពង់ឆ្នាំង។ នេះបើតាមការបញ្ជាក់របស់ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក្នុងសន្និសីទសារព័ត៌មានស្ដីពី «ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តកំពង់ឆ្នាំង» រៀបចំឡើងដោយអង្គភាពអ្នកនាំពាក្យរាជរដ្ឋាភិបាល កាលពីរសៀលថ្ងៃទី២៦ ខែមករា ។
ជាមួយគ្នានេះ ឯកឧត្តម ស៊ុន សុវណ្ណារិទ្ធិ បានបន្តថា រដ្ឋបាលខេត្ត ក៏គ្រោងសាងសង់វេទិកាសម្រាប់ប្រារព្ធពិធីបុណ្យអុំទូកប្រចាំឆ្នាំផងដែរ ខណៈរដ្ឋបាលខេត្តកំពុងរៀបចំសណ្តាប់ធ្នាប់ និងបរិស្ថានតាមជួរមាត់ទន្លេ ក្នុងនោះមានដូចជាការបន្លាស់ទីតូបលក់ដូរជួរដើមស្រល់មុខវត្តយាយទេពចំនួន១៩៦តូប សាងសង់ហេដ្ឋារចនាសម្ព័ន្ធផ្លូវថ្នល់ក្រួសក្រហម ផ្លូវកៅស៊ូ កសាងរង្វង់មូល សាងសង់ផ្សារកំពង់ឆ្នាំងថ្មី ជាដើម។
គួរបញ្ជាក់ថា ក្នុងគោលដៅរៀបចំសណ្តាប់ធ្នាប់សោភ័ណ្ឌភាពនៅតាមច្រាំងទន្លេ និងដោះស្រាយបញ្ហាបរិស្ថាននៅតាមដងទន្លេសាប រដ្ឋបាលខេត្តកំពង់ឆ្នាំងបានដាក់ចេញផែនការបន្លាស់ទីផ្ទះបណ្តែតទឹកឱ្យឡើងមករស់នៅលើគោក ។ ក្នុងនោះប្រជាពលរដ្ឋខ្មែរ និងខ្មែរឥស្លាមបានបន្លាស់ទីផ្ទះបណ្ដែតទឹកមករស់នៅលើគោកមានចំនួនជាង២ពាន់ខ្នងផ្ទះ និងជនអន្តោប្រវេសន៍វៀតណាមចំនួន ជាង១ខ្នងផ្ទះ៕
