ភ្នំពេញ៖ ការបញ្ចូលសកម្មភាពទេសចរណ៍ និងអេកូទេសចរណ៍នៅក្នុងសហគមន៍ដែលមានសក្តានុពល បានផ្តល់ប្រយោជន៍ជា ច្រើនដល់មូលដ្ឋាន ដូចជាការបង្កើតការងារ ប្រាក់ចំណូល កាត់បន្ថយចំណាកស្រុក និងការអភិវឌ្ឍដោយផ្ទាល់, នេះបើតាមការ អះអាង របស់គណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ (គ.ជ.អ.អ.)។
ការអះអាងនេះធ្វើឡើងក្នុងកិច្ចប្រជុំលើកទី១របស់ គ.ជ.អ.អ. នាថ្ងៃទី៣១ ខែមីនា ឆ្នាំ២០២២ នៅទីស្តីការក្រសួងទេសចរណ៍ និងតាមប្រព័ន្ធ Zoom ក្រោមអធិបតីភាពឯកឧត្តម ថោង ខុន រដ្ឋមន្រ្តីក្រសួងទេសចរណ៍ និងជាប្រធាន គ.ជ.អ.អ. ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាអនុប្រធានអចិន្ត្រៃយ៍ គ.ជ.អ.អ. និងឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាអនុប្រធាន គ.ជ.អ.អ.។
ថ្នាក់ដឹកនាំនៃគណៈកម្មាធិការជាតិ គ.ជ.អ.អ. សុទ្ធតែបានមើលឃើញថា ការបញ្ចូលសកម្មភាពទេសចរណ៍ និងអេកូទេសចរណ៍នៅក្នុងសហគមន៍ដែលមានសក្តានុពល បានផ្តល់ប្រយោជន៍ជាច្រើន ដូចជាការបង្កើតការងារ ប្រាក់ចំណូល និងការអភិវឌ្ឍនៅតាមមូលដ្ឋានផ្ទាល់ មិនថាសហគមន៍នោះស្ថិតក្រោមក្រសួងណាឡើយ។
ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានលើកឡើងថា ប្រជាពលរដ្ឋ និងទេសចរបរទេសផ្ទៃក្នុងកាន់តែច្រើនបាននាំគ្នាដើរកម្សាន្តទៅកាន់តំបន់អេកូទេសចរណ៍ សហគមន៍ទេសចរណ៍ និងតំបន់ទេសចរណ៍ផ្សងព្រេងនានា ដែលបានបង្កើតប្រាក់ចំណូលដោយផ្ទាល់ជូនប្រជាសហគមន៍ និងកំពុងធ្វើឲ្យវិស័យអេកូទេសចរណ៍ និងសហគមន៍ទេសចរណ៍មានភាពធន់នឹងវិបត្តិ រួមចំណែកទ្រទ្រង់ដល់វិស័យទេសចរណ៍ជារួម ។
ឯកឧត្តម ថោង ខុន បានរំលេចបន្ថែមថា តំបន់អេកូទេសចរណ៍សំខាន់ៗ ដូចជាតំបន់ខ្នងផ្សារ ភ្នំឱរ៉ាល់ គិរីរម្យ ជីផាត អារ៉ែង ពាមក្រសោប ស្រែអំបិល វាលធំ សំឡូត ភ្នំត្បែង សមុទ្រឈើ តំបន់រ៉ាមសារ បឹងទន្លេសាប ភ្នំគូលែន និងតំបន់អេកូទេសចរណ៍ផ្សេងទៀតជាច្រើន សុទ្ធតែទទួលបានកំណើនភ្ញៀវទេសចរផ្ទៃក្នុងគួរឱ្យកត់សម្គាល់ក្នុងដំណាក់កាលវិបត្តិកូវីដ-១៩ ក្នុងឆ្នាំ២០២០ និងឆ្នាំ២០២១ កន្លងមក។
ឯកឧត្តម បានបញ្ជាក់ទៀតថា កម្ពុជាត្រូវបានទទួលស្គាល់ជាលក្ខណៈអន្តរជាតិលើការងារសហគមន៍ និងអេកូទេសចរណ៍ តាមរយៈការអនុវត្តគំរូអភិវឌ្ឍសហគមន៍ទេសចរណ៍ ក្រោមទម្រង់ភាពជាដៃគូ-រដ្ឋ-ឯកជន-ប្រជាជន (4Ps) ដោយលើកទឹកចិត្តការវិនិយោគខ្នាតតូច មធ្យម និងធំទាំងឡាយណាដែលតម្រូវឲ្យមានការចូលរួមពីប្រជាជនមូលដ្ឋាន ផ្តល់សិទ្ធិអំណាចដល់ប្រជាពលរដ្ឋសហគមន៍ (Local Empowerment) ផ្តល់ប្រយោជន៍អតិបរមាដល់មូលដ្ឋាន និងគោរពតាមគោលការណ៍ចីរភាព និងទទួលខុសត្រូវ ស្របតាមទស្សនាទាន «ការអភិរក្សបម្រើដល់ការអភិវឌ្ឍ ការអភិវឌ្ឍបម្រើដល់ការអភិរក្ស» និងស្របតាមគោលការណ៍នៃការបែងចែកផលប្រយោជន៍ប្រកបដោយសមធម៌ (Equitable Profit-Sharing Model)។
ជាមួយគ្នានេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទក៏បានបង្ហាញនូវការរីករាយដែលសហគមន៍កសិកម្ម សហគមន៍ជលផល សហគមន៍នេសាទ សហគមន៍ការពារព្រៃឈើដែលស្ថិតក្រោមក្រសួងកសិកម្ម បានដាក់បញ្ចូលសកម្មភាពទេសចរណ៍ និងអេកូទេសចរណ៍ ហើយក្រសួងកសិកម្មផ្ទាល់ ក៏ដូចជាអង្គភាពចំណុះក្រោមក្រសួងកសិកម្ម ក៏បានចូលរួមយ៉ាងសកម្មក្នុងការជួយរៀបចំ គាំទ្រ និងសហការជាមួយប្រជាសហគមន៍ផងដែរ។
ឯកឧត្តម សាយ សំអាល រដ្ឋមន្ត្រីក្រសួងបរិស្ថាន ក៏បានលើកឡើងដែរថា ការបញ្ចូលសកម្មភាពទេសចរណ៍ និងអេកូទេសចរណ៍នៅក្នុងសហគមន៍ដែលមានសក្តានុពល មិនត្រឹមតែជួយអភិវឌ្ឍសេដ្ឋកិច្ចនៅមូលដ្ឋានប៉ុណ្ណោះទេ តែក៏បានជួយដល់កិច្ចការអភិរក្សការពារធនធានធម្មជាតិ បេតិកភណ្ឌវប្បធម៌រូបី និងអរូបីយផងដែរ។
ឯកឧត្តម រដ្ឋមន្ត្រីក្រសួងបរិស្ថាន បានគាំទ្រទស្សនាទាន «ទេសចរណ៍ផ្សារភ្ជាប់ជាមួយទឹកដី» ដែលឯកឧត្តមរដ្ឋមន្ត្រី ថោង ខុន តែងតែបានជំរុញយ៉ាងសកម្ម ដោយរំលឹកនូវពាក្យស្លោកមួយខ្លីថា «ស្រឡាញ់ជាតិ ត្រូវស្គាល់ទឹកដី» ព្រោះនេះជាអ្វីដែលយុវជនកម្ពុជាគ្រប់គ្នាគួរតែចូលរួមស្គាល់ទឹកដីរបស់ខ្លួនឱ្យបានច្រើនតាមដែលអាចធ្វើទៅបាន ៕
