នៅពេលការងារ សិល្បៈលូតលាស់បន្តបន្ទាប់ តារាវ័យក្មេងមុខដូចតួចិនហុងកុង រូបនេះសន្យាថា មិនបណ្តោយពេលនោះទេ ប្រសិនបើមានការទាក់ទង។ លោកក៏មានទេពកោសល្យច្រើនក្នុងការសម្តែង ដែលអ្នកសិល្បៈច្រើនលើកសរសើរ។ បាត់មុខពីសិល្បៈមួយរយៈតារាសម្ដែងវ័យ ក្មេងលោក គីម ផាន់ណាវីត ទើបតែវិលមកកាន់ការសម្ដែងប្រមាណជាមួយឆ្នាំចុងក្រោយប៉ុណ្ណោះ ប៉ុន្តែគេកត់សម្គាល់ថាទីផ្សារសិល្បៈរបស់លោករីកលូតលាស់ដាច់ឆ្ងាយពីការសស្រាក់សស្រាំលើកមុនៗ។ អ៊ីចឹងហើយ ទើបក្នុងពិធីខួបកំណើតរបស់លោកកាលពីថ្ងៃទី៣ កុម្ភៈ ឆ្នាំ២០២០ មានសិល្បករចូលរួមច្រើន។
លោក គីម ផាន់ណាវីត និយាយថាកន្លងមកលោកធ្លាប់តែធ្វើខួបកំណើតតូចៗជាលក្ខណៈគ្រួសារតែប៉ុណ្ណោះ ទើបលោកសប្បាយចិត្តនៅពេលលោកធ្វើខួបធំ ហើយមានតារាសិល្បៈ និងភ្ញៀវកិត្តិយសចូលរួមកុះករ។ ពិធីក៏ដើម្បីជួបជាអ្នកសិល្បៈ និងដើម្បីពង្រីកកេរ្តិ៍ឈ្មោះរបស់លោកក្រោយពេលឡើងកូដផងដែរ។ លោកក៏ប្រកាសនឹងធ្វើខួបអោយធំនៅឆ្នាំក្រោយ ប្រសិនបើការងារសិល្បៈរបស់លោកកាន់តែមានការឈាន ឡើងនោះផងដែរ។
លោក គីម ផាន់ណាវីត បន្តថា ចាប់ពីពេលនេះតទៅ លោកនឹងទទួលការងារសិល្បៈអោយពេញទំហឹងមិនឈប់បាត់មុខទៀតទេ បន្ទាប់ពីលោកសម្រេចចិត្តព្យួរចោលការសិក្សាផ្នែកទីផ្សារត្រឹមឆ្នាំទី២ ដោយលោកបញ្ជាក់ថាដើម្បីមានពេលរកលុយ និងសាងកេរ្តិ៍ឈ្មោះនៅក្នុងពិភពសម្ដែង។ ក្នុងនោះលោកក៏ត្រៀមបើកហាងផាប់ និងហាងលក់អាហារបន្ទាប់ពីបញ្ចប់ពិធីខួបកំណើតផងដែរ ដើម្បីមានចំណូលទប់នឹងការងារសិល្បៈ។ លោកទើបតែបានថតបញ្ចប់រឿង”មន្តស្នេហ៍នាងដារីយ៉ា” ដែលជារឿងភាគរបស់ផលិតកម្មក្លាស៊ីក ត្រៀមនឹងដាក់បញ្ចាំងនៅTVK ខណៈដែលក្នុងពេលនេះលោកក៏មានឱកាសថតMV និង បទចម្រៀងអោយផលិតកម្មហង្សមាសជាដើម ដែលធ្វើអោយលោកមើលឃើញពីការឈានឡើងក្នុងសិល្បៈ។ ដោយឡែកក្នុងពិធីខួបរបស់លោក គេឃើញមានវត្តមានតារាថ្មីៗជាច្រើនរូប ដោយតារាល្បីៗ ក៏មានវត្តមានចូលរួមមិនតិចនាក់ផងដែរ៕
