សម្តេចសង្ឃ ទេព វង្ស យាងត្រឡប់មកដល់កម្ពុជាវិញ ក្រោយគង់ព្យាបាលនៅប្រទេសវៀតណាម

កាលពីរសៀលថ្ងៃទី៣១ មករា ឆ្នាំ២០២០ សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃ​ព្រះ​រា​ជា​​ណាចក្រកម្ពុជា ទ្រង់​បាន​យាង​មាតុភូមិនិវត្តន៍មកដល់កម្ពុជាវិញហេីយ បន្ទាប់ព្រះអង្គ​បាន​សម្រាក​ព្រះកាយ​ព្យាបាល​ព្រះរោគ នៅឯ​មន្ទី​ពេទ្យ​រដ្ឋ​ នៃសាធារណៈរដ្ឋសង្គមនិមវៀតណាម ។ ទទួលថ្វាយព្រះរាជដំណេីរ យាងមាតុភូមិនិវត្តន៍ របស់សម្តេចជាអម្ចាស់ នៅ​អកាស​យាន​ដ្ឋានអ​ន្តរ​ជា​តិ​ភ្នំពេញ ច្រកពិសេស រួមមានសម្តេច ព្រះសង្ឃ ព្រមទាំងព្រះមន្រ្តីសង្ឃ សមណនិស្សិត សមណសិស្ស រួមនឹង មន្រ្តីជាន់ខ្ពស់ក្រសួងធម្មការ និង​សាសនា ជាច្រេីនទៀត ។

ក្នុងបេសកកម្មអមដំណើររយៈ ពេលចំនួន២ខែកន្លងផុតទៅ សង្កេតឃើញមាន គណៈប្រតិភូអមដំណើរសម្តេច ព្រះមហាសង្ឃរាជ បំពេញ​ព្រះ​រាជ​ទស្សនកិច្ច និងព្យាបាលព្រះរោគនៅបរទេស ចាប់ពីថ្ងៃទី២ ខែធ្នូ ឆ្នាំ២០១៩ ដល់ថ្ងៃទី៣១ មករា ឆ្នាំ២០២០ រួមមាន៖ ព្រះនិស្ស័សសត្ថា សៀរ ភារ៉ា ព្រះលេខាធិការផ្ទាល់ ព្រះមហាសង្ឃរាជ ព្រះឥន្ទសិរីវង្ស តាត វិបុល ព្រះមហា ឈឿន សុនី លោកជំទាវ ជា សំអេង ឯកឧត្តម ចាន់ ជា និងលោក ព្រឹម ច្រឹក ។

បើទោះជាសម្តេចសង្ឃ ទ្រង់អាពាធព្យាធិមួយចំនួន ដែលចាំបាច់អោយវិជ្ជបណ្ឌិតឯកទេស ពិនិត្យព្យាបាល ព្រះអង្គ នៅតែឆ្លៀត​បំពេញ​ផ្សព្វ​ផ្សាយ​​ពុទ្ឋសាសនា ភាពរីកចម្រើនរបស់វិស័យព្រះពុទ្ឋសាសនា ដល់ប្រជាជនវៀតណាម ។ ទាំងនេះជាការលើក​កម្ពស់វិស័យពុទ្ឋសាសនា មិន​ថាក្នុងនិងក្រៅប្រទេស ក្នុងន័យចេះជួយថែរក្សាការពារ និងផ្តល់ឱវាទដល់ប្រជាជនគ្រប់ជាតិសាសន៏ចេះស្រឡាញ់រាប់អានគ្នា កសាង​អ្វី​ជា​សន្តិភាព​ទៅវិញទៅមក។


យោងតាមអាការៈព្រះកាយរបស់ព្រះអង្គ រងអាពាធផ្នែកតំរងនោមដោយក្រុមគ្រូពេទ្យនាប្រទេសវៀតណាមសម្រួលការព្យាបាលបានធូរ​ស្បើយ​​​ច្រើន។ ក្រៅពីនេះព្រះអង្គបានវះកាត់ភ្នែក ដើម្បីសម្រួលការទត អោយបានប្រសើរ។ យ៉ាងណាមិញ ព្រះសង្ឃរាជ​នៅបន្តចាក​ចេញ​ទៅពិនិត្យ​តាមដាន​ព្រះសុខភាព នៅប្រទេសវៀតណាម​តាមស្ថាន​ការជាក់​ស្តែង។ ជាទម្លាប់ព្រះអង្គ​ គឺយាងទៅសម្រាកកាយព្យាបាលនៅប្រទេស​វៀត​ណាម​ មិនមានទៅប្រទេសណាទៀតនោះទេ ខណៈខាង​មន្ទីរពេទ្យវៀតណាមទទួលស្វាគមន៏យ៉ាងយកចិត្តទុកដាក់កក់ក្តៅ។ ពុទ្ធបរិស័ទ​ទាំង​ក្នុង​និងក្រៅប្រទេស ពេលទទួលដំណឹងការយាងនិវត្តន៏មក ដល់មាតុប្រទេសវិញ ម្នាក់ៗបួងសួង ដល់វត្ថុស័កសិទ្ឋិលើលោកបីបាច់ថែរក្សា សម្តេច​សង្ឃ ទេព វង្ស ពោរពេញដោយព្រះសុខភាពល្អ ដើម្បីបន្តដឹកនាំវិស័យ​ព្រះពុទ្ធ​សាសនាខ្មែរ​យើង​បន្តទៀត៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង