កុមារាអាយុ៨ឆ្នាំម្នាក់ ទិញផាវយកមកដុតលេងបោះចូលក្នុងធុងសាំង បណ្ដាលឲ្យធុងសាំងផ្ទុះប៉ើងបុកត្រូវគ្រាប់ភ្នែកស្លាប់ភ្លាមៗនៅកន្លែងកើតហេតុ ។ ហេតុការណ៍នេះ បានកើតឡើងនៅវេលាម៉ោងប្រមាណ១០ព្រឹក ថ្ងៃទី២៥ ខែមករា ឆ្នាំ២០២០ ស្ថិតក្នុងភូមិពោធិ៍ក្រោម ឃុំត្រើយស្លា ស្រុកស្អាង ខេត្តកណ្ដាល ។
មន្ត្រីនគរបាលស្រុកស្អាងបានឲ្យដឹងថា កុមារារងគ្រោះដែលត្រូវរបួសបែកគ្រាប់ភ្នែក រហូតស្លាប់ភ្លាមៗឈ្មោះ ផាន់ណា ដារ៉ូ មានទីលំនៅភូមិពោធិ៍ក្រោម ឃុំត្រើយស្លា ស្រុកស្អាង ខេត្តកណ្ដាល ។
ប្រភពដដែលបន្តថា តាមការសាកសួរបំភ្លឺ និងពិនិត្យវិភាគទីកន្លែងកើតហេតុ សមត្ថកិច្ចបានសន្និដ្ឋានថា ជនរងគ្រោះបានទិញផាវ ដែលមានសញ្ញា POP (ផាវកន្ទឹម) ដុតទម្លាក់ចូលក្នុងធុងសាំង ដោយធុងសាំងមានជាតិប្រេងសាំង និងរុនមូលតូច ដែលនាំឲ្យមានចំហេះខ្លាំង ក៏ផ្ទុះទម្លាយបុកធាក់សន្ទះខាងលើចេញ បណ្តាលឲ្យត្រូវចំមុខ និងគ្រាប់ភ្នែកកុមារារងគ្រោះស្លាប់តែម្តង ៕
សាកសពកុមារារងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
