ភ្នំពេញ៖ អន្តរាគមន៍បិទភ្ជិតទំនប់សណ្តស្ទឹងព្រែកត្នោតក្នុងភូមិកន្ទុយទឹក សង្កាត់ទៀន ដែលធ្លាយបាក់ដោយសារទឹកជំនន់កាលពីយប់ថ្ងៃទី២៦ ខែតុលា ឆ្នាំ២០២១ បានបញ្ចប់រួចរាល់ហើយកាលល្ងាចថ្ងៃទី២៩ ខែតុលា ឆ្នាំ២០២១ ដោយមានកិច្ចសហការរវាងក្រសួងធនធានទឹក និងឧតុនិយម និង អាជ្ញាធររាជធានីភ្នំពេញ ។
ក្រសួងធនធានទឹក និងឧតុនិយម បានអោយដឹងថា ចំណុចដែលបាក់ធ្លាយជាសំណង់ទ្វារទឹកចាស់ កសាងឡើងក្នុងរបបប្រល័យពូជសាសន៍ប៉ុលពតត្រូវគេលប់ជាច្រើនឆ្នាំមកហើយ។ ក្រោយរងការខូចខាតពេលនេះក្រុមការងារក្រសួងធនធានទឹក និងឧតុនិយម បានបន្តជួសជុល និងកែលម្អផ្លូវបន្ថែម ដើម្បីបើកបម្រើដល់ការធ្វើចរាចរណ៍ជាប្រក្រតីភាពឡើងវិញជូនប្រជាពលរដ្ឋ។
ក្រសួងធនធានទឹក និងឧតុនិយម បានអោយដឹងទៀតថា ជំនន់ទឹកស្ទឹងព្រែកត្នោតក្នុងឆ្នាំ២០២១នេះ ក៏បានបញ្ចប់ជាស្ថាពរដែរនៅរសៀលនៅថ្ងៃទី២៩ ខែតុលា ម្សិលមិញ ដោយកម្ពស់ទឹកស្ទឹងព្រែកត្នោតមានត្រឹម ៥,០៨ម៉ែត្រ ខណៈដែលកម្រិតប្រកាសអាសន្នគឺ ៥,១០ម៉ែត្រ ហើយថ្ងៃទី២៧ ខែតុលា ដែលទឹកជំនន់ឡើងដល់ចំណុចកំពូល គឺកម្ពស់ទឹកអតិបរមា ៦,៥៨ម៉ែត្រ ។
ដោយឡែក អាជ្ញាធររាជធានីភ្នំពេញ កាលពីថ្ងៃម្សិលមិញក៏បានស្តារផ្លូវដែលខូចខាតឡើងវិញ និងកាយផ្តាច់ជាបណ្តោះអាសន្នផ្លូវបេតុង ចំណុចវត្តតាក្តុល ដើម្បីបង្ហូរទឹកដែលនៅសល់ដកចេញពីភូមិចំនួន ៣ ក្នុងសង្កាត់សាក់សំពៅ មកស្ទឹងព្រែកត្នោតវិញ ក្រោយពីទឹកស្ទឹងបានស្រកចុះ។
គួរបញ្ជាក់ថា ជំនន់ទឹកស្ទឹងព្រែកត្នោត បានចាប់ផ្ដើមគំរាមកំហែងខ្លាំងដល់ ភូមិសាស្រ្តតាមសណ្តរស្ទឹង ក្នុងខណ្ឌដង្កោតាំងពីថ្ងៃទី២៥ ខែតុលា បង្កអោយមានទឹកហៀរចេញភូមិសាស្ត្រទំនាប និងមានរូងនាគមួយចំនួនតាមតួទំនប់។ ទោះបីជាអាជ្ញាធររាជធានីភ្នំពេញ បានប្រើប្រាស់កម្លាំង និងគ្រឿងចក្រលើកទំនប់ទប់និងបិទរូងនាគមួយចំនួនដែលលិចធ្លាយក៏ដោយ ក៏ទឹកស្ទឹងព្រែកត្នោតបានហក់ឡើងយ៉ាងខ្លាំង ហៀរជន់លិចនៅលំនៅឋាន និងបង្កឲ្យមានផលប៉ះពាល់ដោយផ្ទាល់ និងដោយប្រយោលដល់បងប្អូនប្រជាពលរដ្ឋជាច្រើនគ្រួសារក្នុងសង្កាត់មួយចំនួនរបស់ ខណ្ឌដង្កោ ៕
