ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានកំណត់ឲ្យមន្ត្រីជំនាញ និងអាជ្ញាធរមូលដ្ឋានរួមសហការគ្នាយកចិត្តទុកដាក់បង្ការ ទប់ស្កាត់ កុំឲ្យមានភ្លើងឆេះព្រៃនៅក្នុងរដូវក្ដៅនេះ ក្នុងភូមិសាស្ត្រខេត្តកំពង់ឆ្នាំង។ ការកំណត់របស់ឯកឧត្តមអភិបាលខេត្តដូចនេះ បានធ្វើឡើងនៅកិច្ចប្រជុំត្រួតពិនិត្យលទ្ធផលការងារប្រចាំខែមករាឆ្នាំ២០២០ និង លើកទិសដៅអនុវត្តបន្តរបស់គណៈបញ្ជាការឯកភាពរដ្ឋបាលខេត្តកំពង់ឆ្នាំង នាព្រឹកថ្ងៃទី២៣ ខែមករា ឆ្នាំ២០២០។
ក្រៅពីណែនាំអោយមន្ត្រីជំនាញយកចិត្តទុកដាក់ជាមួយបញ្ហាភ្លើងឆេះព្រៃ ឯកឧត្តម អភិបាលខេត្ត ក៏បានណែនាំដល់ កងកំលាំងគ្រប់ប្រភេទ អភិបាលក្រុង ស្រុក ត្រូវធ្វើការរៀបចំសណ្តាប់ធ្នាប់ សន្តិសុខក្នុងមូលដ្ឋាន រួមមាន បញ្ហាក្មេងទំនើង បញ្ហាគ្រឿងញៀន បញ្ហាគ្រោះថ្នាក់ចរាចរណ៍ ជាពិសេសការជួយសង្គ្រោះស្រូវប្រាំងរបស់ប្រជាកសិករនៅតាមតំបន់មួយចំនួនដែលកំពុងខ្វះទឹកជាដើម ។
គួរបញ្ជាក់ថា ក្នុងពិធីសម្ពោធ និងប្រកាសដាក់ឲ្យដំណើរការជាផ្លូវការនូវ អង្គភាពច្រកចេញចូលតែមួយ និងការិយាល័យ ប្រជាពលរដ្ឋរាជធានី-ខេត្ត នៅខេត្តពោធិ៍សាត់ កាលពីថ្ងៃទី២២ ខែមករា ឆ្នាំ២០២០ សម្ដេចក្រឡាហោម ស ខេង បានប្រាប់ទៅកាន់អភិបាលខេត្តទាំងឡាយណា ដែលមានព្រៃឈើច្រើន ត្រូវយកចិត្តទុកដាក់បង្ការ ទប់ស្កាត់ កុំឲ្យមានភ្លើងឆេះព្រៃនៅក្នុងរដូវក្ដៅនេះ។ សារអំពាវនាវរបស់សម្ដេចក្រឡាហោម ស ខេង នេះធ្វើឡើងបន្ទាប់ពីមើលឃើញពីផលលំបាក ដោយសារតែភ្លើងឆេះព្រៃនៅប្រទេសអូស្ដ្រាលី កាលពីពេលថ្មីៗនេះ ដែលធ្វើឲ្យបាត់បង់អាយុជីវិតមនុស្ស សត្វ និងខាតបង់ថវិកាអស់ជាច្រើនលានដុល្លារ៕
