កំពង់ឆ្នាំង ៖ កម្មករបូមខ្សាច់ម្នាក់បានស្លាប់ភ្លាមៗនៅក្នុងរណ្តៅខ្សាច់ បន្ទាប់ពីខ្សាច់បាក់សង្កត់លើ ក្នុងពេលដែលកម្មករូបនេះ កំពុងបូមខ្សាច់ចេញពីរណ្តៅមកដាក់នៅខាងលើ ។
ហេតុការណ៍នេះបានកើតឡើងកាលពីវេលាម៉ោង១១និង៣០នាទី ថ្ងៃទី២៦ខែកុម្ភៈ ឆ្នាំ២០២១ នៅភូមិល្វា ឃុំស្វាយរំពា ស្រុកកំពង់លែង ខេត្តកំពង់ឆ្នាំង ។
លោកប៉ាល់ ជឿន អធិការនគរបាលស្រុកកំពង់លែង បានប្រាប់ឲ្យដឹងថា ជនរងគ្រោះមានឈ្មោះវៃ សុវណ្ណ ភេទប្រុស អាយុ ១៦ឆ្នាំ ជាកម្មករស៊ីឈ្នួលបូមខ្សាច់ រស់នៅក្នុងភូមិឃុំខាងលើ ។
លោកអធិការបានប្រាប់ឲ្យដឹងទៀតថា នៅមុនពេលកើតហេតុ មានកម្មករចំនួន៣នាក់បានចុះទៅក្នុងរណ្តៅខ្សាច់ដើម្បី រៀបចំបូមខ្សាច់មកដាក់នៅខាងលើ ប៉ុន្តែនៅពេលដែលកំពុងតែបូម ស្រាប់តែគំនរខ្សាច់នៅខាងលើ បានបាក់រលុះចុះមកខាងក្រោម បណ្តាលឲ្យសង្កត់កម្មករ នៅក្នុងរណ្តៅខ្សាច់នោះតែម្តង។ ភ្លាមៗនោះ មានកម្មករផ្សេងទៀត បានជួយកាយខ្សាច់ដែលបាក់សង្កត់លើកម្មករនោះដែរ ប៉ុន្តែជួយមិនទាន់ ក៏បណ្តាលឲ្យជនរងគ្រោះថប់ដង្ហើមស្លាប់ដោយសារខ្សាច់សង្កត់លើតែម្តង ។
ប្រជាពលរដ្ឋបានលើកឡើងថា ការស្លាប់របស់កម្មករនាពេលនេះក៏អាចបណ្តាល មកពីការធ្វេសប្រហេសរបស់ម្ចាស់អាជីវកម្មបូមខ្សាច់ រហូតបង្ករឲ្យមានគ្រោះថ្នាក់ការងារបែបនេះកើតឡើង។ ដែលករណីនេះជាការទទួលខុសត្រូវរបស់ ម្ចាស់អាជីវកម្ម ។
គេនៅចាំមើលថា តើម្ចាស់បូមខ្សាច់មួយនេះ នឹងទទួលខុសត្រូវបែបណាចំពោះគ្រោះថ្នាក់ការងារបណ្តាលឲ្យមនុស្សស្លាប់បែបនេះ ហើយសមត្ថកិច្ច និង អាជ្ញាធរ នឹងចាត់វិធានការបែបណាចំពោះម្ចាស់អាជីវមកម្មខាងលើ ព្រោះថាកម្មករដែលស្លាប់នេះគឺនៅកន្លែងបូមខ្សាច់ របស់ម្ចាស់អាជីវកម្មបូមខ្សាច់ដែមានឈ្មោះដា រស់នៅភូមិត្អួរលំ ឃុំកំពង់ហៅ ស្រុកកំពង់លែង ខេត្តកំពង់ឆ្នាំង ៕
