មន្ត្រីនគរបាលជាន់ខ្ពស់នៃអគ្គស្នងការដ្ឋាននគរបាលជាតិជាង១០០នាក់ កាលព្រឹកថ្ងៃទី២៣ ខែកុម្ភៈនេះ បានអញ្ជើញមកចាក់វ៉ាក់សាំង ការពារកូវីដ ១៩ នៅមន្ទីរពេទ្យមិត្តភាពខ្មែរ-សូវៀត។
ក្នុងឳកាសអញ្ជើញដឹកនាំនាយនគរបាលជាន់ខ្ពស់ ចាក់វ៉ាក់សាំងការពារជំងឺកូវីដ-១៩ នោះ ឯកឧត្ដម នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ បានបញ្ជាក់ថា កម្លាំង នគរបាលជាតិគ្រប់ផ្នែក និងគ្រប់អង្គភាពពាក់ព័ន្ធទាំងអស់ មានជំនឿជឿជាក់ លើវ៉ាក់សាំង ស៊ីណូហ្វាម របស់រដ្ឋាភិបាលនៃសាធារណរដ្ឋប្រជាមានិតចិន ហើយកម្លាំងនគរបាលជាតិទូទាំងប្រទេសប្រមាណជាង៦ ម៉ឺននាក់ ក៏បានត្រៀមខ្លួនជារួចស្រេចហើយ សម្រាប់ការទទួលយកការចាក់វ៉ាក់សាំងនេះ ដើម្បីការពារខ្លួនជៀសផុតពីជំងឺឆ្លងកូវីដ១៩ ក្នុងប្រតិបត្តិការការពារសន្តិសុខ សណ្ដាប់សាធារណៈជូនប្រជាពលរដ្ឋ ។
ឯកឧត្ដម នាយឧត្តមសេនីយ៍ ក៏បាន សម្តែង នូវទឹកចិត្តសប្បាយរីករាយ និងរំភើប ដោយសារឃើញ ការយកចិត្តទុកដាក់ ពីសំណាក់ សម្តេចតេជោ ហ៊ុន សែន ជាប្រមុខ ដែលតែងតែគិតគូរអំពីបញ្ហាសុខទុក្ខ និងកិច្ចការពារសុវត្ថិភាពសន្តិ សុខ ជូនប្រជាជនកម្ពុជាទាំងមូល។
តាមរបាយការណ៍របស់ក្រសួងសុខាភិបាល បានបង្ហាញថា គិតចាប់ពីថ្ងៃទី១០ រហូត ដល់ថ្ងៃទី២២ ខែកុម្ភៈ ឆ្នាំ២០២១ ក្រសួងសុខាភិបាល បានចាក់វ៉ាក់សាំងកូវីដ១៩ ស៊ីណូហ្វាមរបស់ ចិន ជូនអ្នក ស្ម័គ្រចិត្ត បានចំនួន ៥៨៦០នាក់ហើយ ក្នុងនោះស្ត្រីមានចំនួន ១៩៧៦នាក់៕
