កងកម្លាំងវិស្វកម្មសំណង់លេខ៥៧៦ ចំនួន២០៤នាក់ ក្នុងនោះមានស្ត្រី១៥នាក់ ដែលជាកងកម្លាំងមួកខៀវប្តូរវេន នារាត្រីថ្ងៃទី១៩ ខែកុម្ភៈ ឆ្នាំ២០២១នេះ បានធ្វើដំណើរចេញទៅបំពេញបេសកកម្មក្រោមឆត្រអង្គការសហប្រជាជាតិ ក្នុងបុព្វហេតុសន្តិភាព កិច្ចការមនុស្សធម៌នៅលើពិភពលោក នៅសាធារណរដ្ឋអាហ្វ្រិកកណ្តាល ។
ក្នុងឳកាសជួបសំណេះសំណាលជាមួយកងកម្លាំងមួកខៀវមុនចេញដំណើរ នៅអាកាសយាន្តដ្ឋានអន្តរជាតិភ្នំពេញ ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រង កងកម្លាំងរក្សា សន្តិភាព បោសសម្អាត មីន និងកាកសំណល់សង្គ្រាម បានបញ្ជាក់ថា កម្ពុជាមានការប្រុងប្រយ័ត្នខ្ពស់ ក្នុងការទប់ស្កាត់ចំពោះការឆ្លងរីករាលដាលមេរោគកូវិដ១៩ នៅពេលផ្លាស់ប្តូរកងកម្លាំងម្តងៗ ។ ក្នុងនោះមជ្ឈមណ្ឌលជាតិគ្រប់គ្រងកម្លាំងរក្សាសន្តិភាព ក៏បានបន្តក្រើនរំលឹកដល់កម្លាំងមួកខៀវកម្ពុជាទាំងអស់ដែលកំពុងបំពេញបេសកកម្មនៅក្រៅប្រទេសអោយមានការប្រុងប្រយ័ត្នខ្ពស់ចំពោះ ជំងឺកូវីដ១៩នេះផងដែរ។
ជាមួយគ្នានោះ ឯកឧត្តម នាយឧត្តមសេនីយ៍ បានបន្ថែមថា ជំហររបស់កម្ពុជា បើទោះបីជាប្រទេសក្រីក្រ និងកំពុងប្រឈមជាមួយកូវីដ១៩បន្ថែមដោយប្រទេសដែលកងទ័ពមួក ខៀវកម្ពុជាត្រូវទៅបំពេញបេសកកម្មក៏កំពុងមានការវាយលុកដោយកូវីដ១៩ក៏ដោយ ក៏រាជរដ្ឋាភិបាលកម្ពុជា និងកងទ័ពរបស់ខ្លួន មិនបោះបង់ចោលភារកិច្ចក្នុងការចូលរួមថែរក្សាសន្តិភាពនៅតាមប្រទេសនានាក្រោមឆត្ររបស់អង្គការសហប្រជាជាតិនោះឡើយ ពោលគឺកម្ពុជាចូលរួមដោយស្ម័គ្រចិត្តនិងការទទួលខុសត្រូវក្នុង ឋាន:ជាសមាជិកអង្គការសហប្រជាជាតិ។
គួរបញ្ជាក់ថា ការប្តូរវេនកងកម្លាំងនេះ គឺធ្វើឡើងដោយតម្រូវអោយមានលិខិតបញ្ជាក់ថា បុគ្គលនីមួយៗមិនមានផ្ទុកមេរោគកូវីដ១៩ និងតម្រូវអោយធ្វើចត្តាឡីស័កមុនចេញដំណើររយៈពេល១៤ថ្ងៃ ហើយត្រូវធ្វើចត្តាឡីស័ករយៈពេល១៤ថ្ងៃទៀតពេលទៅដល់តំបន់ បេសកកម្ម ទើបអនុញ្ញាតអោយធ្វើការចល័តទៅកាន់ទីតាំងឈរជើង។
បច្ចុប្បន្ន កម្ពុជាមានកម្លាំងមួកខៀវ សរុបជិត ៨០០នាក់ ក្នុងនោះមាននារីជិត ៨០នាក់ បាននឹងកំពុងបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ នៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្តាល៕
