ខេត្តកំពង់ឆ្នាំង ៖ នាយប៉ុស្តិ៍នគបាលរដ្ឋបាលឃុំស្រែថ្មី ត្រូវបានគេប្រទះឃើញដេកស្លាប់នៅលើប៉ាវអ៊ី ក្នុងប៉ុស្តិម្នាក់ឯងដែលគេដាក់ការសង្ស័យថាបណ្តាលមកពីជម្ងឺប្រចាំកាយ ( លើសឈាម ) ។
ហេតុការណ៍នេះបង្ករឲ្យមានការភ្ញាក់ផ្អើលនៅវេលាម៉ោង៨និង៣០នាទីព្រឹកថ្ងៃទី១៦ ខែកុម្ភ: ឆ្នាំ២០២១ នៅក្នុងប៉ុស្តិនគបាលស្ថិតនៅក្នុងភូមិសន្ទួច ឃុំស្រែថ្មីស្រុករលាប្អៀរ ខេត្តកំពង់ឆ្នាំង ។
ប្រភពពីសមត្ថកិច្ចបានឲ្យដឹងថា សពឈ្មោះកែវ សុផង់ អាយុ៥៥ឆ្នាំ មានតួនាទីជានាយប៉ុស្តិរដ្ឋបាលស្រែថ្មីមានប្រពន្ធឈ្មោះប៉ែន សុខនី អាយុ៥៣ ឆ្នាំ មានកូន៧នាក់ រស់នៅក្នុងភូមិគល់គប់ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ។
ប្រភពខាងលើបានឲ្យដឹងទៀតថា នៅមុនពេលកើតហេតុវេលាម៉ោង១រំលងអាធ្រាតុឈានចូលថ្ងៃទី១៦ ខែកុម្ភ: ឆ្នាំ២០២១ លោកមេប៉ុស្តិបាននិយាយវិទ្យុទាក់ទងជាមួយលោកអធិការនៅក្នុងបន្ទប់ម្នាក់ឯងដែលបិទគន្លឹះពីខាងក្នុង ។ លុះព្រឹកឡើងដោយមិនឃើញលោកមេប៉ុស្តិងើបពីដំណេក មន្ត្រីនគរបាលម្នាក់បានទៅដាស់ឲ្យភ្ញាក់ ដើម្បីទៅប្រជុំនៅអធិការដ្ឋាននគរបាលស្រុករលារប្អៀរ តែមិនឃើញមានការឆ្លើយតប ក៏អើតមើលពីខាងក្រៅឃើញលោកមេប៉ុស្តិដេកស្លៀកខោខ្លីខ្លួនទទេអត់ពាក់អាវនៅលើប៉ាវអ៊ី ដោយមានការសង្ស័យ ក៏បានជម្រាបទៅលោកមេឃុំនិងក្រុមប្រឹក្សាឃុំស្រែថ្មី ព្រមទាំងលោកអនុប្រធានប៉ុសន៍ឱ្យជួយពិនិត្យមើលព្រោះបិទទ្វារនិងដាក់គន្លិះពីខាងក្នុងហើយបានរាយការណ៍ជូនទៅលោកអធិការនគរបាលស្រុករលារប្អៀរបន្ថែមទៀត។ ក្រោយមកភ្លាមៗនោះក៏បានគាស់បង្អួចចូលទៅមើលទើបដឹងថា លោកមេប៉ុស្តិ បានដេកស្លាប់នៅលើប៉ាវអ៊ីមិនដឹងតាំពីពេលណានោះទេ ។
សមត្ថកិច្ចជំនាញ បានសន្និដ្ឋានថា លោកមេប៉ុស្តិអាចស្លាប់ចន្លោះពីម៉ោង២ទៅម៉ោង ៣ទៀបភ្លឺ និង អាចបណ្តាលមកពីជម្ងឺរប្រចាំកាយ( ជម្ងឺរលើសឈាម ) ហើយបានប្រគល់សពជូនក្រុមគ្រួសារយកទៅកាន់លំនៅដ្ឋាន ដើម្បីរៀបចំធ្វើបុណ្យតាមប្រពៃណីផងដែរ ៕
