កំពង់ឆ្នាំង៖ រយៈពេល៣ថ្ងៃនៃពិធីបុណ្យចូលឆ្នាំចិន គិតចាប់ពីថ្ងៃទី១២ ដល់ទី១៤ ខែកុម្ភៈ ខេត្តកំពង់ឆ្នាំង ទទួលបានភ្ញៀវទេសចរចំនួន ៨៥៦២នាក់ ក្នុងនោះអ្នកទេសចរជាតិ៨៥៥៣នាក់ និងអ្នកទេសចរបរទេស ៩នាក់ ។ នេះបើតាមអោយដឹងពីរបាយការណ៍របស់ មន្ទីរទេសចរណ៍ខេត្តកំពង់ឆ្នាំង។
មន្ទីរទេសចរណ៍ខេត្តកំពង់ឆ្នាំង បានបញ្ជាក់ថា នៅគ្រប់គោលដៅទេសចរណ៍ក្នុងខេត្ត បានខិតខំអនុវត្តតាមគោលណែនាំរបស់ក្រសួងសុខាភិបាល និងវិធានសុវត្ថិភាពទេសចរណ៍របស់ក្រសួងទេសចរណ៍ ដើម្បីទប់ស្កាត់ការរីករាលដាលនៃជំងឺកូវីដ-១៩ ។
ដោយឡែក ចំពោះការគ្រប់គ្រងសន្តិសុខ សណ្ដាប់ធ្នាប់ មន្ទីរទេសចរណ៍ខេត្តកំពង់ឆ្នាំង បានឲ្យដឹងថា ជាទូទៅស្ថានភាពសន្តិសុខ សណ្ដាប់ធ្នាប់ មានភាពល្អប្រសើរ មិនមានបញ្ហា ឬការរំខានណាមួយកើតឡើងគួរកត់សម្គាល់ទេ។
គួរបញ្ជាក់ថា នាឱកាសពិធីបុណ្យចូលឆ្នាំប្រជាជនចិន-វៀតណាម រយៈពេល៣ថ្ងៃ ចាប់ពីថ្ងៃ១២ដល់ថ្ងៃទី១៤ ខែកុម្ភៈ ឆ្នាំ២០២១ កម្ពុជាទទួលបានភ្ញៀវទេសចរសរុបជិត៩០ម៉ឺននាក់ ។ ចំនួននេះមានការថយចុះ ២,២៣ភាគរយ បើធៀបនឹងរយៈពេលដូចគ្នាឆ្នាំ២០២០៕
