ចាប់ខ្លួនជនសង្ស័យ៣នាក់ និងរឹបអូសគ្រឿងញៀន ជាង១៤គីឡូក្រាម នៅខណ្ឌទួលគោក

កម្លាំង​នគរ​បាល​នៃមន្ទីរ​ប្រឆាំង​គ្រឿង​ញៀន​ របស់​អគ្គស្នង​ការ​ដ្ឋាន​​នគរបាលជាតិ បាន​បើក​ប្រតិបត្តិ​ការ​បង្ក្រាប​ករណី ជួញ​ដូរ​គ្រឿង​ញៀន​មួយ​ករណី​ដក​ហូត​បាន​ជាង​១៤​គីឡូក្រាម ​និង​ឃាត់​ខ្លួន​មនុស្ស​ចំនួន៣នាក់។

មន្ទីរ​ប្រឆាំង​គ្រឿង​ញៀន​ បាន​ឲ្យ​ដឹង​ថា ប្រតិបត្តិ​ការបង្រ្កាប​នេះ​ធ្វើឡើង​ កាលពីថ្ងៃទី០៧ ខែមករា ឆ្នាំ២០២០ នៅ​ចំណុច​ខារ៉ា​អូខេ​ ផ្ទះ​លេខ​៥៦ ផ្លូវ​លេខ​២៣០​ សង្កាត់​ទឹក​ល្អក់​៣ ខណ្ឌ​ទួល​គោក រាជធានី​ភ្នំពេញ​ និង​មាន​ការ​សម្រប​សម្រួល​ពី​ លោក គុជ គឹមឡុង ព្រះ​រាជ​អាជ្ញា​រង​រាជ​ធានី​ភ្នំពេញ​។

ប្រភពដដែល បានអោយដឹងទៀតថា ជា​លទ្ធ​ផល​នៃ​ប្រតិបត្តិការ​ កម្លាំង​សមត្ថកិច្ចជំនាញ​ឃាត់​ខ្លួន​បាន​ជន​សង្ស័យ​៣នាក់​ ទី១​៖ឈ្មោះ​ ម៉េង ឌី អាយុ​២២​ឆ្នាំ  ​ទី២៖​ឈ្មោះ ប៊ុនធឿន​ ធានី​ អាយុ​២៣ឆ្នាំ​ និង​ទី៣​៖ឈ្មោះ ​ជា ​ភារុណ ​អាយុ២១​ឆ្នាំ ។ ជាមួយគ្នានោះដក​​ហូត​​វត្ថុតាង​បាន សារ​ធាតុ​ញៀន​សរុប​ ជាង​១៤គីឡូក្រាម​ រួមមាន​ សារធាតុញៀន​ មេតំហ្វេតាមីន​ (ICE) ទម្ងន់​សុទ្ធ៥,២២២.៨៣ក្រាម  ​នីមេតា​ហ្សេ​ប៉ាមទម្ងន់៨,៨២៩.៧២ក្រាម ​ស្មើ​នឹង​៤៩,០៥៤គ្រាប់​។

បច្ចុប្បន្ន​ជនសង្ស័យ​ទាំង៣នាក់​ ​ត្រូវ​កម្លាំង​នគរបាល​ជំនាញ​កំពុង​កសាង​សំណុំ​រឿង​ ដើម្បី​បញ្ជូន​ទៅតុលាការ ​ចាត់ការបន្ដតាមនីតិវិធី៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង