សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) និង ក្រុមហ៊ុនកំពង់ចម្លងភ្នំពេញអរិយក្សត្រ និងជ្រោយចង្វារ ស្វាយជ្រំ ចុះអនុស្សរណៈយោគយល់គ្នា ដើម្បីគាំទ្រនិងធ្វើសកម្មភាពមនុស្សធម៌

សមាគមគ្រូពេទ្យស្ម័គ្រចិត្តយុវជន​សម្តេចតេជោ (TYDA) និង ក្រុមហ៊ុនកំពង់​ចម្លង ភ្នំពេញ​អរិយក្សត្រ និងជ្រោយ​ចង្វារ ស្វាយជ្រំ បាន​ចុះ​អនុស្សរណៈយោគយល់គ្នា (MOU) ដើម្បីគាំទ្រ និងធ្វើសកម្មភាពមនុស្សធម៌ តាមរយៈការធ្វើសកម្មភាពពិនិត្យ និងព្យាបាល​ប្រជា​ពល​រដ្ឋដោយឥតគិតថ្លៃ។

ឯកឧត្តម ហ៊ុន ម៉ាណែត ជាប្រធានក្រុមប្រឹក្សាភិបាលសមាគមគ្រូពេទ្យយុវជនស្ម័គ្រចិត្តសម្ដេចតេជោ(TYDA) បានលើកឡើងថា លទ្ធ​ភាព និងសកម្មភាពជួយគ្នានៅក្នុងការងារមនុស្សធម៌គឺជាការផ្ដល់នូវលទ្ធផលជាក់ស្ដែងដល់សង្គមជាតិ ពីព្រោះ​មាន​លទ្ធភាព​ហើយ​បើ​មិនមានសកម្មភាពក៏មិនអាចជួយឲ្យមានលទ្ធផលបានដែរ។ឯកឧត្តម បន្ថែមថានេះគឺជាថ្ងៃពិសេសដែលសមាគមគ្រូពេទ្យស្ម័គ្រចិត្តយុវជនសម្តេចតេជោនិងក្រុមហ៊ុនកំពង់ចម្លង​ភ្នំពេញ-អរិយ​ក្សត្រ​ និង ជ្រោយចង្វារ-ស្វាយជ្រំ បានភ្ជាប់និស្ស័យចុះអនុស្សារណៈយោគយល់គ្នាដើម្បីផ្ដល់លទ្ធភាពនិងកិច្ចសហការមនុស្សធម៌​ដើម្បី​ជួយសង្គ្រោះ​ប្រជាពលរដ្ឋនៅក្នុងការព្យាបាលប្រជាពលរដ្ឋដោយឥតគិតថ្លៃ។ក្នុងពិធីចុះអនុស្សរណៈយោគយល់គ្នាកាលពីថ្ងៃទី២០ ខែវិច្ឆិកា  លោក អាន សំអន នាយកកំពង់ចម្លង ក៏បានលើកឡើងដែរថា ដោយ​បាន​មើលឃើញពីទស្សនៈវិស័យ នូវសកម្មភាពមនុស្សធម៌ របស់សមាគមគ្រូពេទ្យស្ម័គ្រចិត្តយុវជនសម្ដេចតេជោ ក្រុមហ៊ុនកំពង់​ចម្លង​​​ភ្នំពេញ-អរិយក្សត្រ និង ជ្រោយចង្វារ-ស្វាយជ្រំ បានចាប់អារម្មណ៍នឹងចូលរួមសកម្មភាពមនុស្សធម៌ដើម្បីជួយសង្គ្រោះ​និងផ្ដល់​ស្នាម​ញញឹមចំពោះប្រជាពលរដ្ឋនៅ​ទូទាំងប្រទេសតាមរយៈការផ្ដល់សេវា​ពិនិត្យ​ និងព្យាបាលប្រជាពលរដ្ឋដោយឥតគិតថ្លៃ។

 

គួរបញ្ជាក់ថា សមាគមគ្រូពេទ្យយុវជនស្ម័គ្រចិត្តសម្ដេចតេជោ(TYDA) ក្រៅពីចុះបេសកកម្មព្យាបាលប្រជាពលរដ្ឋដោយ​ឥតគិតថ្លៃ​នៅ​តាម​​បណ្ដាខេត្តនោះ ក៏មានការចុះអប់រំសុខភាព និងព្យាបាលដោយឥតគិតថ្លៃដល់សហគមន៍ក្រីក្រ រោងចក្រ មជ្ឈមណ្ឌល​កុមារ​កំព្រា​​​ជាដើម។ ហើយសកម្មភាពទាំងអស់នេះមានការចូលរួមពីសប្បុរសជនដែលមានទឹកចិត្តសប្បុរសធម៌ជួយផ្ដល់លទ្ធភាព​ដល់​សមា​គម​ដើម្បីធ្វើសកម្មភាពមនុស្សធម៌ជូនប្រជាពលរដ្ឋ។

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង