កំពង់ឆ្នាំង ៖ កិច្ចប្រជុំសាមញ្ញលើកទី១៦ អាណត្តិទី៣ របស់ក្រុមប្រឹក្សាខេត្តកំពង់ឆ្នាំង ត្រូវបានធ្វើឡើងកាលពីព្រឹកថ្ងៃទី១ខែតុលា ឆ្នាំ២០២០ ដោយបានប្រព្រឹត្តទៅក្រោមអធិបតីភពឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង និង ឯកឧត្តមអម សុភា អភិបាលរងខេត្ត និងមានការចូលរួមពីសំណាក់ថ្នាក់ដឹកនាំមន្ទីរ មន្រ្តីជំនាញ តាមមន្ទីរអង្គភាពជុំវិញខេត្ត ផងដែរ។ កិច្ចប្រជុំក្រុមប្រឹក្សានាពេលនេះធ្វើឡើងដើម្បីពិនិត្យ និង ឆ្លងរបាយការណ៍សមិទ្ធផលសកម្មភាពការងាររបស់រដ្ឋបាលខេត្តកំពង់ឆ្នាំងដែលបានសម្រេចបាននាខែកន្លងមក។
ឯកឧត្តម អម សុភា អភិបាលរងខេត្តកំពង់ឆ្នាំង បានមានប្រសាសន៍ថា នៅក្នុងរយៈពេលកន្លងមកនេះខេត្តកំពង់ឆ្នាំង បានជម្រុញការអភិវឌ្ឍន៍លើគ្រប់វិស័យ ដោយធានាបាននូវសន្តិសុខ សុវត្ថិភាព និង កំណើនសេដ្ឋកិច្ចផងដែរ ។ ដើម្បីចូលរួមអនុវត្តន៍ជាមួយនិងគោលនយោបាយរបស់រាជរដ្ឋាភិបាល ក្នុងដំណាក់កាលនៃស្ថានភាពប្រយុទ្ធប្រឆាំង នឹង ជំងឺកូវីដ១៩ រដ្ឋបាលខេត្តកំពង់ឆ្នាំង បានបំពេញបេសកម្មយ៉ាងយកចិត្តទុកដាក់ និង បានបន្តធ្វើការផ្សព្វផ្សាយដោយផ្ទាល់នៅមូលដ្ឋានជាប់ជាប្រចាំ ។
ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង បានសម្តែងនូវការកោតសរសើរ ចំពោះគណអភិបាលខត្តមន្រ្តីរាជការគ្រប់លំដាប់ថ្នាក់ដែលបានរួបរួមគ្នាកសាងនិងអភិវឌ្ឍន៍ខេត្ត ដែលធ្វើអោយខេត្តមួយនេះមានការកែប្រែមុខមាត់ថ្មី ទាក់ទាញបានវិយោគិនមកបណ្តាក់ទុនរកស៊ី ធ្វើអោយប្រជាពលរដ្ឋមានជីវភាពកាន់តែប្រសើរឡើងថែមទៀត ពិសេស គឺការចូលរួមលើកកម្ពស់ផលិតភាពលើវិស័យកសិកម្ម ។
ឯកឧត្តម ឡុង ឈុនឡៃ បានបញ្ជាក់ថា ដើម្បីអោយខេត្តកំពង់ឆ្នាំង មានការអភិវឌ្ឍន៍បន្ថែមទៀតនោះ មន្ទីរជំនាញ និង អាជ្ញាធរមូលដ្ឋានគ្រប់លំដាប់ថ្នាក់ ត្រៀមចូលរួមដោះស្រាយរាល់បញ្ហាប្រឈមដែលអាចកើតឡើងក្នុងមូលដ្ឋានរបស់ខ្លួនអោយបានទាន់ពេលវេលា ។ ដោយឆ្លើយតបបានតាមតម្រូវការរបស់ប្រជាពលរដ្ឋនៅមូលដ្ឋាន ។ បញ្ហាសសន្តិសុខ សុវត្ថិភាព សណ្តាប់ធ្នាប់សាធារណៈគឺជាកត្តាមួយដែលអាជ្ញាធរមូលដ្ឋានត្រូវបន្តយកចិត្តទុកដាក់ ការពារជូនប្រជាពលរដ្ឋឲ្យបានល្អ និង ត្រូវចូលរួមអនុវត្តឲ្យបាននូវគោលនយោបាយភូមិឃុំមានសុវត្ថិភាពផងដែរ ៕
