កំពង់ឆ្នាំង ៖ ភូមិចំនួន៤៥ស្ថិតនៅក្នុស្រុកទឹកផុស និង ស្រុកសាមគ្គីមានជ័យ របស់ខេត្តកំពង់ឆ្នាំង នឹង ទទួលបានគម្រោង ទឹកស្អាតនិងអនាម័យ ដែលគម្រោងនេះគាំទ្រដោយ ដោយសាធាររណរដ្ឋឆែកនិង អង្គការ LWD ។ ការប្រកាសដាក់ចេញជាផ្លូវការ នៃការអនុវត្តគម្រោងនេះ គឺបានធ្វើឡើងកាលពីព្រឹកថ្ងៃទី៨ ខែកញ្ញា ឆ្នាំ២០២០ នៅសាលាខេត្តកំពង់ឆ្នាំង ដោយមានការអញ្ជើញចូលរួមពីលោក វ្លាស់ទីមីល តេសារ ភារធារីស្តីទីស្ថានទូតសាធាររណរដ្ឋឆែក និង លោក អម សុភា អភិបាលរងខេត្តកំពង់ឆ្នាំង ។
លោក វ្លាស់ទីមីល តេសារ ភារធារីស្តីទីស្ថានទូតសាធាររណរដ្ឋឆែក បានឲ្យដឹងថា នៅថ្ងៃនេះ សាធារណរដ្ឋឆែកបានដាក់ចេញជាផ្លូវការនូវគម្រោងសហត្របតិបត្តិការ អភិវឌ្ឍន៍ថ្មី ដោយផ្តោតលើការធ្វើឲ្យប្រសើរឡើងនូវវិស័យទឹកស្អាតនិងអនាម័យនៅក្នុងខេត្តកំពង់ឆ្នាំង ។គម្រោងនេះមានរយៈពេល៤ឆ្នាំ ប្រជាពលរដ្ឋដែលទទួលផលនៃការអនុវត្តគម្រោងនេះ មានចំនួន៩៦៦២គ្រួសារ ស្ថិតក្នុងភូមិគោលដៅចំនួន៤៥ ក្នុងស្រុកសាមគ្គីមានជ័យ និង ស្រុកទឹកផុស ខេត្តកំពង់ឆ្នាំង ដែលបានទទួលទឹកស្អាតយកមកប្រើប្រាស់ ។
លោកភារធារីស្តីទីស្ថានទូតសាធាររណរដ្ឋឆែកបានឲ្យដឹងទៀតថា ទឹកស្អាតនិងអនាម័យ ជាអទិភាពមួយ របស់សាធារណរដ្ឋឆែកនៅកម្ពុជា ហើយយើងចាត់ទុកថា ការផ្គត់ផ្គង់ទឹកស្អាត មានសុវត្ថិភាព ជាធាតុដ៏សំខាន់សម្រាប់សុខភាពប្រជាជន ។ប្រសិនបើទឹកមិនមានគុណភាពសមស្របទេនោះវានឹងបង្ករបញ្ហាសុខភាពធ្ងន់ធ្ងរ ។ ដូចនេះការសំអាតអនាម័យត្រឹមត្រូវ ពិតជាចាំបាច់ ដែលអាចជួយយើងឲ្យចៀសផុត នូវជំងឺឆ្លងផ្សេងៗ ដែលនឹងធ្វើឲ្យប្រជាជនមានសុវត្ថិភាពនិងសុខភាពល្អ ។
ជាមួយគ្នានោះ លោក អម សុភា អភិបាលរងខេត្តកំពង់ឆ្នាំង បានសម្តែងនូវអំណរគុណយ៉ាងជ្រាលជ្រៅចំពោះកិច្ចសហការ ក្នុងការគាំទ្ររបស់សាធាររណរដ្ឋឆែកនិង អង្គការLWD ដែលបានគិតគូអំពីសុខភាពប្រជាពលរដ្ឋនៅជនបទ តាមរយៈគាំទ្រឲ្យមានគម្រោងទឹស្អាតនេះឡើង ដើម្បីជួយដល់ប្រជាពលរដ្ឋនៅខេត្តកំពង់ឆ្នាំង ។
លោកអភិបាលរងខេត្តកំពង់ឆ្នាំង បានបញ្ជាក់ទៀតថា បច្ចុប្បន្នខេត្តកំពង់ឆ្នាំង មានក្រុមការងារបចេ្ចកទេស វិស័យផ្គត់ផ្គង់ទឹកស្អាត និង អនាម័យ ថ្នាក់ខេត្ត ក្រុង ស្រុក ឃុំសង្កាត់ ដែលសកម្មភាពនេះ ជាចំណុចមួយ ដែលរាជរដ្ឋាភិបាលបានយកចិត្តទុកដាក់ជាខ្លាំង ដោយបានកំណត់ដាក់់ចេញជាផែនការជាតិរហូតដល់ឆ្នាំ២០៥០ធ្វើយ៉ាងណាអោយបជាពលរដ្ឋនៅជនបទទាំងអស់ទទួលបានទឹកស្អាតនិងអនាម័យប្រើប្រាស់១០០ភាគរយ ។
អនាម័យជនបទ ជាបញ្ហាប្រឈមដ៏ធំមួយក្នុងវិស័យសុខភាពសាធាណៈ ប្រជាពល រដ្ឋនៅក្នុងសហគមន៍ ។ ការប្រតិបត្តិអនាម័យឲ្យបានជាប្រចាំនឹងឈានទៅធ្វើការផ្លាស់ប្តូរ ទម្លាប់ ពីការរស់នៅគ្មានអនាម័យ ឲ្យក្លាយជាការរស់នៅមានអនាម័យ ដើម្បីលើកម្ពស់សុខភាពសាធារណៈ និងជីវភាពរស់នៅរបស់ពួកគាត់ឲ្យមានភាពប្រសើរឡើងនៅតាមសហគមន៍ទូទាំងខេត្ត ៕
