កំពង់ឆ្នាំង ៖ ដើម្បីចូលរួមជាមួយនឹងពុទ្ធបរិស័ទ ប្រជាពលរដ្ឋនៅក្នុងឱកាសនៃបុណ្យចូលព្រះវស្សានេះ នៅថ្ងៃួទី៤ ខែកក្កដា ឆ្នាំ២០២០ សម្តេចចៅហ្វាវាំង គង់ សំអុល ឧបនាយករដ្ឋមន្រ្តី រដ្ឋមន្រ្តីក្រសួងព្រះបរមរាជវាំង អមដំណើរដោយ ឯកឧត្តមទេសរដ្ឋមន្រ្តី គុយ សុផល ឧត្តមក្រុមប្រឹក្សាផ្ទាល់ព្រះមហាក្សត្រ និង ជាទេសរដ្ឋមន្រ្តីទទួលបន្ទុកកិច្ចការទូទៅ អមក្រសួងព្រះបរមរាជវាំង ព្រមទាំងមានការចូលរួមពីថ្នាក់ដឹកនាំមន្ទីរអង្គភាពជុំវិញខេត្ត បាននាំយកបច្ច័យនិងទេយ្យវត្ថុ ប្រគេនព្រះសិរីធម្មញ្ញាណសុខ ថាន ព្រះមេគុណខេត្ត និង ព្រះសង្ឃគង់ចាំព្រះវស្សា នៅវត្តអារញ្ញិការាម ស្ថិតនៅសង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
នៅក្នុងឱកាសនោះសម្តេចចៅហ្វាវាំង គង់ សំអុល និង ឯកឧត្តមគុយ សុផល បានថ្វាយភួងផ្កា ដល់ព្រះពុទ្ធរូបដែលជាទីគោរពសក្ការៈសម្រាប់ប្រជាពុទ្ធិសាសនិកគ្រប់រូប ព្រមអុជធូបបួងសួងសូមសេចក្តីសុខ សេចក្តីចម្រើនដល់ប្រជានុជនគ្រប់រូបនៅក្នុងប្រទេសកម្ពុជា ។
បុណ្យចូលព្រះវស្សា ត្រូវបានប្រារព្ធធ្វើឡើងតាមព្រះវិន័យ ដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឲ្យព្រះសង្ឃសាវ័កគ្រប់អង្គប្រតិបត្តិតាម ដែលមានរយៈពេល៣ខែ ពោលគឺចាប់ថ្ងៃ១រោចខែអាសាធ ដល់ទី១៥កើតខែអស្សុជ ។
ការបញ្ញត្តិឲ្យមានការកាន់ព្រះវស្សាគឺព្រះពុទ្ធជាម្ចាស់ទ្រង់មានព្រះបំណងចង់ឲ្យព្រះសង្ឃមានភាពងាយស្រួល ក្នុងរដូវវស្សារយៈពេលខែនេះ ដែលជារដូវពោរពេញទៅដោយភ្លៀងធ្លាក់ ជោគជាំ សម្បូរភក់ជ្រាំច្រើន។ តាមទម្លាប់ពុទ្ធបរិស័ទតែងតែនាំយកនូវទេយ្យទាន ដូចជា អង្ករ ទៀន ធូប ប្រេង ស្បង់ ចីវរ សំពត់ សាដក និង គ្រឿងសម្ភារៈដទៃទៀត ទៅប្រគេនព្រះសង្ឃតាមវត្តអារាម ដើម្បីផ្គត់ផ្គង់ក្នុងកំឡុងពេលនៃការចូលព្រះវស្សានេះ។
នៅក្នុងឱកាសនោះសម្តេច ចៅហ្វាវាំងគង់សំអុល និង ឯកឧត្តម ទេសរដ្ឋមន្ត្រីគុយ សុផល ប្រគេននូវបច្ច័យ សារដក់ និង ទេយ្យទានជាច្រើនទៀតផងដែរ ដល់ព្រះសិរីធម្មញ្ញណ សុខ ថាន ព្រះមេគុណខេត្ត ក្នុងរដូវកាលបុណ្យចូលកាន់ព្រះវស្សានេះសម្រាប់ផ្គត់ផ្គង់ព្រះសង្ឃក្នុងរដូវចូលកាន់វស្សានេះ ៕
