លោកជំទាវ កែ ច័ន្ទមុនី អ្នកតំណាងរាស្រ្តមណ្ឌលកំពង់ឆ្នាំង និងជាប្រធានកិត្តិយសគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត កាលពីរសៀលថ្ងៃទី៣ ខែកក្កដា បានអញ្ជើញដឹកនាំសមាជិកាសមាគមចុះសួរសុខទុក និងនាំយកអំណោយជូនដល់ ស្រ្តីរងគ្រោះដោយសារភ្លើងឆេះខ្លួន កាលពីថ្ងៃទី០១ ខែកក្ដដា ឆ្នាំ២០២០ នៅភូមិកំពង់បាស្រូវត្បូង ឃុំជលសា ស្រុកជលគិរី ខេត្តកំពង់ឆ្នាំង។
អំណោយដែលបាននាំយកទៅជូនក្នុងឱកាសនោះរួមមាន ទឹកសុទ្ធ១កេស ក្រមា១ សារ៉ុង១ បំពង់ទឹកក្ដៅ១ ធុងទឹកកកតូច១ និងថវិកា ចំនួន ៤១០.០០០រៀល សម្រាប់ស្រ្តីរលាកភ្លើង ។ ដោយឡែកជាមួយគ្នានោះ លោកជំទាវ កែ ច័ន្ទមុនី ក៏បានផ្តល់ថវិកាជូនលោកយាយចាស់ជរាចំនួន ៣១០ ០០០រៀលផងដែរ ។
គួរបញ្ជាក់ថា កាលពីវេលាម៉ោង៨និង៣៥នាទីព្រឹកថ្ងៃទី១ ខែកក្កដា ឆ្នាំ២០២០ ស្ត្រីម្នាក់រួមនឹងកូនតូចម្នាក់ទៀត បានរងរបួសរលាកពេញខ្លួន ក្នុងហេតុការណ៍ឆេះប្រេងសាំង នៅភូមិកំពង់បាស្រូវត្បូង ឃុំជលសា ស្រុកជលគិរី ខេត្តកំពង់ឆ្នាំង។ ស្ត្រីរងគ្រោះមានឈ្មោះ ណែម ឡា អាយុ ៣៧ ឆ្នាំ និងកូនប្រុសម្នាក់ទៀតឈ្មោះសាំង គឹមស៊ន់ អាយុ៣ឆ្នាំរស់នៅក្នុងភូមិឃុំខាងលើ។
ក្រោយពេលកើតហេតុជនរងគ្រោះទាំងពីរនាក់ត្រូវបានគេបញ្ជូនទៅសង្គ្រោះនៅមន្ទីរពេទ្យ ។ ដោយសាររបួសធ្ងន់ធ្ងរពេក កុមារារងគ្រោះត្រូវបានបញ្ជូនបន្តទៅព្យាបាលមន្ទីរពេទ្យគន្ធបុប្ផា ហើយស្ត្រីជាម្ដាយសម្រាកនៅមន្ទីរពេទ្យខេត្តកំពង់ឆ្នាំង៕
