ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការងកងយោធពលខេមរភូមិន្ទ បានបញ្ជាក់ថា រថយន្តចំនួន២៩០គ្រឿង ដែលបានប្រគល់ជូនដល់អង្គភាពចំនួន ២៤ ចំណុះអោយកងយោធពលខេមរភូមិន្ទ និងអគ្គស្នងការដ្ឋាននគរបាលជាតិនេះ បានមកការចូលរួមថវិការបស់សប្បុរសជន និងក្រុមហ៊ុនឯកជននានា តាមរយៈសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មិនមែនជាជំនួយរបស់ភាគីចិនដូចការលើកឡើងរបស់អ្នកវិភាគមួយចំនួននោះឡើយ។
ការបញ្ជាក់ដូចនេះបានធ្វើឡើងនៅក្នុងពិធីប្រគល់និងទទួលរថយន្តដែលជាអំណោយដ៏ថ្លៃថ្លារបស់ សម្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់កងយោធពលខេមរភូមិន្ទ និងកងនគរបាលជាតិ នៅពហុកីឡដ្ឋានជាតិអូឡាំពិក កាលពីថ្ងៃទី១៨ ខែមិថុនា ឆ្នាំ២០២០។
ឯកឧត្តម ឧត្តមសេនីយ៍ឯក ក៏បានច្រានចោលទាំងស្រុងចំពោះការវិភាគបំភ្លៃពីសំណាក់អ្នកវិភាគមួយចំនួន ដែលបានលើកឡើងថា ការទិញរថយន្តទាំងនេះបានប្រើប្រាស់ថវិកាជាតិជាដើម។
គួរបញ្ជាក់ថា រថយន្តទាំង២៩០គ្រឿងនេះត្រូវបានកម្ពុជាកម្មង់ទិញពីប្រទេសចិនតាំងពីពាក់កណ្តាលឆ្នាំ២០១៩មកម្ល៉េះ ពោលគឺនៅមុនពេលមានការផ្ទុះឡើងនៃជំងឺកូវិដ១៩ ប៉ុន្តែទើបបញ្ជូនមកដល់កម្ពុជាកាលពីប៉ុន្មានថ្ងៃមុននេះ ។ ការរថយន្តចំនួន២៩០គ្រឿង ជូនដល់អង្គភាពចំនួន ២៤ ចំណុះអោយកងយោធពលខេមរភូមិន្ទ និងអគ្គស្នងការដ្ឋាននគរបាលជាតិ គឺដើម្បីទុកបម្រើដល់ការងារការពារជាតិ និងរក្សាសន្តិសុខទូទៅ ដល់ប្រជាពលរដ្ឋទូទាំងប្រទេស៕
