ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានទទួលសៀវភៅស្តីពី ប្រវត្តិសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាភរិយា សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ទាំងជាភាសាអង់គ្លេស និងភាសាខ្មែរ នៅទីស្តីការក្រសួងព័ត៌មាន កាលពីព្រឹកថ្ងៃទី២២ ខែឧសភា ឆ្នាំ២០២០នេះ។
ក្នុងពេលចូលជួបសម្ដែងការគួរសមចំពោះឯកឧត្តមរដ្ឋមន្រ្តី ឯកឧត្តម ឆាយ សុផល អ្នកនិពន្ធសៀវភៅ បានប្រគល់សៀវភៅចំនួន១០០ច្បាប់ ទាំងភាសាអង់គ្លេស និងភាសាខ្មែរជូនឯកឧត្តមរដ្ឋមន្រ្តី ដើម្បីការប្រើប្រាស់តាមគោលបំណងរបស់ឯកឧត្តម។
ឯកឧត្តម ឆាយ សុផល បានរៀបរាប់ថា សៀវភៅដែលមានចំណងជើងថា “BUN RANY – THE WIFE OF CAMBODIA’S STRONG MAN” បានបកប្រែពីសៀវភៅជាភាសាខ្មែរ “ប៊ុន រ៉ានី – ភរិយាបុរសខ្លាំងនៃកម្ពុជា” ហើយសៀវភៅជាភាសាខ្មែរនេះបានចេញផ្សាយតាំងពីថ្ងៃទី១០ ខែធ្នូ ឆ្នាំ២០១៩ មកម៉្លេះ ប៉ុន្តែសៀវភៅជាភាសាអង់គ្លេសទើបចេញនៅពាក់កណ្តាលខែឧសភានេះទេ។
ឯកឧត្តម ឆាយ សុផល បញ្ជាក់ថា៖ “ដោយសារខ្ញុំបានទទួលសារតាមអ៊ីមែលផង និងតាមហ្វេសប៊ុកផង ព្រមទាំងមានសំណើពីបណ្ណាគារខ្លះនៅរាជធានីភ្នំពេញថា ពួកគេចង់បានសៀវភៅពីប្រវត្តិរបស់ស្រ្តីទី១នៃកម្ពុជា ទើបខ្ញុំប្រឹងប្រែងធ្វើសៀវភៅនេះជាភាសាអង់គ្លេស។ ការធ្វើសៀវភៅមួយច្បាប់ៗគឺពិតជាមិនងាយស្រួលពេកទេ តែធ្វើដូចម្តេច បើខ្ញុំធ្លាក់ខ្លួនក្នុងអាជីពនេះទៅហើយ”។
បើតាមការរៀបរាប់របស់អ្នកនិពន្ធរូបនេះបានឱ្យដឹងថា សៀវភៅដែលចំណងជើងជាភាសាអង់គ្លេសសរសេរថា “BUN RANY – THE WIFE OF CAMBODIA’S STRONG MAN” ត្រូវបានបកប្រែដោយក្រុមជំនាញ និងមានការកែសម្រួលពីជនជាតិអាម៉េរិក។
នៅក្នុងទំព័រថ្លែងអំណរគុណបានបង្ហាញថា ឯកឧត្តម ឃួង ស្រេង អភិបាលក្រុងភ្នំពេញបានជួយបោះពុម្ភសៀវភៅនេះចំនួនមួយម៉ឺនច្បាប់។ បើតាមការបញ្ជាក់ពីលោក ឆាយ សុផល សៀវភៅនេះក៏ជាការចូលរួមចំណែកអបអរចំពោះសម្តេចទាំងពីរ ដែលមានចៅទី២១ កាលពីសប្តាហ៍មុនដែរ។
បន្ទាប់ពីសៀវភៅនេះទៅ ឯកឧត្តម ឆាយ សុផល បានបញ្ជាក់ថា សៀវភៅ “បងប្អូនប្រុសទាំង៣” ដែលរៀបរាប់ពីសាវតារកូនប្រុសរបស់សម្តេចតេជោ និងសម្តេចកិត្តិព្រឹទ្ធបណ្ឌិត ក៏នឹងត្រូវចេញផ្សាយជាភាសាអង់គ្លេស និងភាសាចិនដែរនៅខែក្រោយនេះ ខណៈដែលសៀវភៅសម្តេចតេជោ ដែលមានចំណងជើងថា “ហ៊ុន សែន – នយោបាយ និងអំណាចក្នុងប្រវត្តិសាស្រ្តខ្មែរជាង៤០ឆ្នាំ” នឹងត្រូវចេញផ្សាយជាភាសាអង់គ្លេសនៅក្នុងអំឡុងខែសីហាឆ្នាំនេះ៕ ប្រភព៖AKP
