មេ​បញ្ជាការ​កង​ទ័ព​ជើង​គោក ជំរុញ​ពល​ទាហាន​ថ្មី​ឲ្យ​យកចិត្ត​ទុក​ដាក់​ស្រូប​យក​​ចំណេះ​ដឹង​​ចេញ​ពីវគ្គហ្វឹក​ហ្វឺន​​​

ក្នុងតួនាទីជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ឯកឧត្តម ឧត្តមសេនីយ៍ឯក ហ៊ុន ម៉ាណែត បានជំរុញដល់ពលទាហានថ្មីដែលទើបត្រូវបាន​ជ្រើសរើស​បំពេញក្របខ័ណ្ឌឱ្យកងទ័ពជើងគោក អោយ​យក​ចិត្តទុកដាក់រៀនសូត្រ ខិតខំគោរពវិន័យ ស្រូបយក​​ចំណេះដឹង និងទាញយកអត្ថប្រយោជន៍ជាក់ស្តែងចេញពីវគ្គហ្វឹកហ្វឺន ។

ការជំរុញនេះបានធ្វើឡើង​ក្នុងពិធីជួបសំណេះសំណាល ជាមួយពលទាហានថ្មី ដែលកំពុងហ្វឹកហ្វឺនរៀនសូត្រនៅ​មជ្ឈមណ្ឌល​ហ្វឹ​កហ្វឺន​កងទ័ពជើងគោក និងនៅសាលាពលទាហានទី៣ យោធភូមិភាគទី៣ ក្នុងខេត្តកំពង់ស្ពឺ កាលពីថ្ងៃទី១៦ ខែមីនា ។

ឯកឧត្តម ឧត្តមសេនីយ៍ឯក បន្តថា ការស្ម័គ្រចិត្តចូលបម្រើកងទ័ព មិនមែនត្រឹមតែជាការប្តូរមក​ពាក់ឯក​សណ្ឋានតែប៉ុណ្ណោះទេ ក្នុងនាម​ជាកងទ័ព គឺត្រូវយល់ដឹងអំពីតួនាទីភារកិច្ចកងទ័ព វិន័យសណ្តាប់​ធ្នាប់ជួរទ័ព និងចំណេះដឹង​យោធា​ផ្សេង​ៗដោយ​ត្រូវ​ឆ្លង​​កាត់ការហ្វឹកហ្វឺនត្រឹមត្រូវ ដែលជាមូលដ្ឋាន​សំខាន់ ដើម្បីឱ្យ​ពលទាហាន​ថ្មីមាន​សមត្ថភាពចេញ​ទៅបំពេញ​ភារកិច្ច​នៅ​តាម​បណ្តា​អង្គភាព ប្រកបដោយសមត្ថភាព។

គួរបញ្ជាក់ថា ពលទាហានថ្មី ដែលទើបទទួលបានការជ្រើសរើសឱ្យចូលបម្រើក្នុងជួរ​កងយោធពល​ខេមរភូមិន្ទនេះ ត្រូវបាន​ឆ្លង​កាត់​ការត្រួតពិនិត្យវាយតម្លៃយ៉ាងហ្មត់ចត់ សំរិតសម្រាំង​ចេញពីបេក្ខជន​ដែល​បានស្ម័គ្រចិត្តដាក់ពាក្យច្រើននាក់ ហើយកំពុង​ឆ្លង​វគ្គហ្វឹក​ហ្វឺន​នៅក្នុងមជ្ឈមណ្ឌលហ្វឹកហ្វឺន​កងទ័ព​ជើង​គោក និងនៅសាលាពលទាហានទី៣យោធភូមិភាគទី៣ ដើម្បីក្លាយ​ខ្លួន​ជាកងទ័ពបម្រើជាតិ ត្រៀមលក្ខណៈបម្រើប្រជាពលរដ្ឋ និងការពារសុខសន្តិភាព៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង