អាជ្ញា​ធរ​រាជធានី​ភ្នំពេញ​ ប្រកាស​ស្វែង​រកក្រុមហ៊ុន​ចូលរួម​ដេញ​ថ្លៃ​ផ្ដល់​សេវា​ប្រមូល​សំរាម​

  • រដ្ឋបាលរាជធានីភ្នំពេញ បានប្រកាសស្វែង​រកក្រុមហ៊ុនដែលមានសមត្ថភាព បទពិសោធន៍ និងហិរញ្ញវត្ថុគ្រប់គ្រាន់ ចូលរួមដេញ​ថ្លៃផ្ដល់​សេវា​ប្រមូលនិងដឹកជញ្ជូនសំរាមនិងសំណង់​រឹងនៅក្នុងទីក្រុង។ តាមលិខិតផ្សព្វផ្សាយជាសាធារណៈរបស់រដ្ឋបាលរាជធានីភ្នំពេញ បាន​អោយ​​ដឹង​ថា កាលបរិច្ឆ​ទ​​ទទួល​​ពាក្យ​ស្នើ​សុំចូល​រួមដេញថ្លៃត្រូវបានកំណត់ចាប់ពីថ្ងៃជូនដំណឹងនេះ​រហូតដល់ថ្ងៃទី៣១ ខែមិនា ឆ្នាំ២០២០ វេលាម៉ោង៤រសៀល ទីកន្លែងទទួល​ពាក្យស្នើសុំ គឺ ទីចាត់ការគ្រប់គ្រង​សំណល់​និង​បរិស្ថាន ជាន់ទី៧ នៅសាលារាជធានីភ្នំពេញ ស្ថិត​លើមហាវិថីព្រះ​មុនីវង្ស សង្កាត់ស្រះចក ខណ្ឌដូន​ពេញ ។

     

    ចំពោះនីតិវិធីដេញថ្លៃ នឹងត្រូវធ្វើឡើងជាពីរដំណាក់ កាលផ្សេងគ្នា ក្នុងនោះក្រុមហ៊ុនដែលទទួល បានការជ្រើសរើសក្នុងដំណាក់​កាលទី១ នឹងមានសិទ្ធិចូលរួមដេញថ្លៃបន្តក្នុងដំណាក់កាលទី២។ រដ្ឋបាលរាជធានីភ្នំពេញ ក៏បានចែកចេញ តំបន់ជា៣តំបន់​សម្រាប់ឲ្យ​ក្រុមហ៊ុន​ធ្វើ​ការ​ជ្រើសរើស ក្នុងការផ្ដល់សេវាប្រមូលនិងដឹកជញ្ជូនសំរាម សំណល់រឹងទៅតាមតំបន់នីមួយៗ។ នេះបើ​តាមលិខិត​ផ្សព្វផ្សាយ​របស់​រដ្ឋ​បាល​​​រាជធានីភ្នំពេញដដែល។

     

    គួររំលឹកថា ក្នុងពិធីប្រគល់សញ្ញាបត្រជូននិស្សិតជាង៤ពាន់នាក់ មកពីសាកលវិទ្យាល័យបៀលប្រាយ (BBU) កាសពីខែតុលា ឆ្នាំ២០១៩ សម្តេចតេជោ ហ៊ុន សែន បានប្រកាស​ដកហូតសិទ្ធិ​ប្រមូល​សំរាមពីក្រុមហ៊ុនស៊ិន​ទ្រី​ ដើម្បីឲ្យរដ្ឋកាន់កាប់សិន ។ សម្តេច បានបញ្ជាក់ថា ការ​ប្រមូល​សំរាម​នៅរាជធានីភ្នំពេញត្រូវដាក់ឱ្យដេញថ្លៃជាថ្មី ហើយក្រុមហ៊ុនស៊ិនទ្រីតែមួយ មិនអាចប្រមូលសំរាម នៅភ្នំពេញ​មានប្រសិទ្ធ​ភាព​នោះឡើយ ត្រូវមានក្រុមហ៊ុនយ៉ាងតិច៣ ឬ៤ជាការល្អ ប្រតិបត្តិការក្នុងការ ប្រមូលសំរាម នៅរាជធានីភ្នំពេញ។

    សូមជម្រាបថា ដោយសារកំណើនប្រជាពលរដ្ឋរាជធានីភ្នំពេញ បានធ្វើឱ្យបរិមាណផលិតសំរាម-សំណល់រឹងកាន់តែមានការកើនទ្បើង ដែល​ជាក់ស្ដែងក្នុងមួយថ្ងៃៗ រាជធានីភ្នំពេញមានសំរាមប្រមាណ ៣០០០តោន ដែលត្រូវបានប្រមូល និងដឹកជាប្រចាំទៅ​ចាក់ចោល​នៅ​ទី​លាន​​​ចាក់សំរាមជើងឯក ៕

    ព័ត៌មាន​ទាក់​ទង

    ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង