ស្ថានីយភ្ញាស់កូនមាន់ កម្រិតស្តង់ដាអន្តរជាតិ និងដំបូងគេបង្អស់នៅកម្ពុជា បានសម្ពោធបើកដំណើរការជាផ្លូវការ កាលពីថ្ងៃទី១៦ ខែមករា ឆ្នាំ២០២៦ ក្រោមវត្តមានឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ។
ស្ថានីយភ្ញាស់កូនមាន់របស់ក្រុមហ៊ុន BDH TMH មានទីតាំងនៅភូមិថ្មីខ្មែរ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង និងមានសមត្ថភាពអាចភ្ញាស់កូនមាន់បានពី ២០ទៅ ៣០លានក្បាល ក្នុងមួយឆ្នាំ។
ស្ថានីយភ្ញាស់កូនមាន់នេះនឹងជួយផ្គត់ផ្គង់កូនមាន់មានគុណភាពខ្ពស់ និងមានប្រសិទ្ធភាពសេដ្ឋកិច្ចសម្រាប់ផ្គត់ផ្គង់ជូនប្រជាកសិករកម្ពុជា។ នេះគឺជំហានដំបូងនៃការវិនិយោគរបស់ក្រុមហ៊ុន BDH TMH នៅកម្ពុជា ដែលទៅមុខនឹងបន្តពង្រីកការភ្ញាស់កូនមាន់ និងការបង្កាត់ពូជមាន់។
ក្រសួងកសិកម្មនឹងបន្តគាំទ្រនិងជ្រោមជ្រែង ការវិនិយោគនិងការអភិវឌ្ឍន៍ ដើម្បីឲ្យអនុវិស័យផលិតកម្មសត្វមាន់រីកចម្រើននិងមានភាពប្រកួតប្រជែង៕
