កំពង់ឆ្នាំង បន្ទាប់ពីមានសំណូមពរ របស់បងប្អូនប្រជាពលរដ្ឋ នៅស្រុកទឹកផុស ខេត្តកំពង់ឆ្នាំង តាមរយៈកិច្ចសម្ភាសន៍ជាមួយអ្នកសារព័ត៌មាន កាលពីថ្ងៃទី១៥ ខែឧសភា ឆ្នាំ២០២៥ ក្នុងឱកាសចូលរួមក្នុងព្រះរាជពិធីច្រត់ព្រះនង្គ័ល ដើម្បីឱ្យពន្លឿនការសាងសង់ផ្លូវពីខ្លុងពពក ទៅកាន់រមនីយដ្ឋាន ទឹកធ្លាក់ថ្មក្រាល ងាយសម្រួលដល់ការធ្វើដំណើរនោះ, ក្រសួងអភិវឌ្ឍន៍ជនបទ ដែលទទួលខុសត្រូវក្នុងការសាងសង់ផ្លូវនេះបានបញ្ជាក់ថា ក្រសួងបានបញ្ចប់នីតិវិធីលទ្ធកម្មរួចរាល់ហើយ សម្រាប់ការសាងសង់ផ្លូវនេះ នឹងចាប់ផ្តើមនៅចុងខែមិថុនា ឆ្នាំ២០២៥ ខាងមុខនេះហើយ។
លោក ពិត ករុណា អ្នកនាំពាក្យក្រសួងអភិវឌ្ឍន៍ជនបទបានបញ្ជាក់ថា«សម្រាប់ខ្សែផ្លូវពីខ្លុងពពក ទៅទឹកធ្លាក់ថ្មក្រាល ស្រុកទឹកផុសនេះ ស្ថិតនៅក្នុងក្របខណ្ឌគម្រោង CSLEP មានប្រវែង២២.៧១គីឡូម៉ែត្រ តម្លៃប្រមាណ ៣.៣៥ លានដុល្លារ បានបញ្ចប់ការដេញថ្លៃ និងផ្តល់កិច្ចសន្យាជូនក្រុមហ៊ុន Shanghai Construction Group។ ការសាងសង់នឹងចាប់ផ្តើមនៅចុងខែមិថុនា ឆ្នាំ២០២៥ខាងមុខ»។
បើតាមលោក ពិត ករុណា, ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នឹងអញ្ជើញដោយផ្ទាល់ ក្នុងការបើកការដ្ឋានស្ថាបនា ខ្សែផ្លូវពីខ្លុងពពកទៅទឹកធ្លាក់ថ្មក្រាល ស្រុកទឹកផុស នាចុងខែមិថុនា ឆ្នាំ២០២៥ខាងមុខនេះ ។
សូមបញ្ជាក់ថា តំបន់ទេសចរណ៍ធម្មជាតិទឹកធ្លាក់ថ្មក្រាល មានទីតាំងស្ថិតនៅក្នុងភូមិកោះខ្ទុំ ឃុំជៀប ស្រុកទឹកផុស ខេត្តកំពង់ឆ្នាំងមានចម្ងាយ២៨គីឡូម៉ែត្រ ពីទីរួមស្រុកទឹកផុស និងប្រមាណជា៥០គីឡូម៉ែត្រភាគខាងលិច នៃទីរួមខេត្តកំពង់ឆ្នាំង ៕
