កំពង់ឆ្នាំង ៖ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដឹកនាំដោយ ឯកឧត្តម លេង ផាលី ជាប្រធានប្រតិបត្តិ នៅថ្ងៃទី៥ ខែឧសភា ឆ្នាំ២០២៤ បានចុះពិនិត្យ ព្យាបាលជំងឺជូនប្រជាពលរដ្ឋនៅក្នុងស្រុករលាប្អៀរ ខេត្តកំពង់ឆ្នាំង ដោយឥតគិតថ្លៃ ។
លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្ត បានឲ្យដឹងថា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលបានចុះមកពិនិត្យ ព្យាបាលជំងឺ ជូនដល់ប្រជាពលរដ្ឋ នៅក្នុងស្រុករលាប្អៀរ ខេត្តកំពង់ឆ្នាំង ដោយឥតគិតថ្លៃនាពេលនេះ មានចំនួន៥៥៥នាក់ ដោយបានពិនិត្យ ព្យាបាល ចែកថ្នាំជូនដល់ប្រជាពលរដ្ឋ ជិត១ម៉ឺននាក់ ព្រមទាំងបានធ្វើការបណ្តុះបណ្តាលវិធីសាស្ត្រសង្គ្រោះបឋម និងការអប់រំសុខភាព ផងដែរ។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម ហ៊ុន ម៉ានី ព្រមទាំងក្រុមគ្រូពេទ្យស្ម័គ្រចិត្តទាំងអស់ ដែលបានសហការរៀបចំ ការពិនិត្យ ព្យាបាល បណ្តុះបណ្តាលវិធីសាស្ត្រសង្គ្រោះបឋម ការអប់រំសុខភាព និងចែកថ្នាំជូនដល់ប្រជាពលរដ្ឋដោយឥតគិតថ្លៃ នៅក្នុងស្រុករលាប្អៀរ នាពេលនេះ ។
ឯកឧត្តម អភិបាលខេត្ត បានឲ្យដឹងទៀតថា នេះជាលើកទី៩ហើយ ដែលក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានចុះមកព្យាបាលជំងឺជូនដល់ប្រជាពលរដ្ឋនៅក្នុងខេត្តកំពង់ឆ្នាំង ដោយឥតគិតថ្លៃ ។ ហើយឯកឧត្តម ក៏បានស្នើដល់ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បន្តជួយពិនិត្យ ព្យាបាលជំងឺជូនប្រជាពលរដ្ឋ នៅតាមបណ្តាមូលដ្ឋាននានា នៅក្នុងខេត្តកំពង់ឆ្នាំង ជាបន្តបន្ទាប់ទៀត ៕
