កំពង់ឆ្នាំង ៖ ស្នងការដ្ឋាននគរបាល ខេត្តកំពង់ឆ្នាំង បានបញ្ចេញរថយន្តជាច្រើនគ្រឿង ដឹកទឹកយកទៅបាញ់នៅតាមសាលារៀន នានា ក្នុងក្រុងកំពង់ឆ្នាំង និងស្រុករលាប្អៀរ ដើម្បីកាត់បន្ថយកម្តៅ ខណៈពេលដែលស្ថានភាពអាកាសធាតុ កំពុងមានសភាពក្តៅខ្លាំងខុសពីធម្មតា ។
លោកឧត្តមសេនីយ៍ត្រី លុយ ឌីណា ស្នងការរងនគរបាល ខេត្តកំពង់ឆ្នាំង បានឲ្យដឹងថា អនុវត្តតាមការណែនាំរបស់ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ស្នងការដ្ឋាននគរបាលខេត្ត បានបញ្ចេញរថយន្តជាច្រើនគ្រឿង ទៅបាញ់ទឹកនៅតាមសាលារៀននានា ដើម្បីកាត់បន្ថយកម្តៅ ដែលមានសភាពក្តៅខ្លាំងខុសពីធម្មតា ដែលអាចប៉ះពាល់ដល់សុខភាពសិស្ស ជាពសេស សិស្សតូចៗ ដែលកំពុងរៀននៅថ្នាក់បឋមសិក្សា ។
លោកស្នងការរង បានឲ្យដឹងទៀតថា កាលពីថ្ងៃទី៣ ពេលព្រឹកបាញ់ទឹកនៅវិទ្យាល័យព្រះបាទសុរាម្រឹត និងនៅពេលរសៀល បាញ់ទឹក នៅសាលាបឋមសិក្សាគំរូក្រុង ។ ហើយនៅថ្ងៃទី៤ ខែឧសភា ឆ្នាំ២០២៤នេះ បាញ់នៅស្រុករលាប្អៀរ ។ ចំពោះការដឹកទឹកយកទៅបាញ់ កាត់បន្ថយកម្តៅនៅតាមសាលារៀននេះ ជាបន្ទុករបស់ស្នងការដ្ឋាននគរបាលខេត្ត ដោយមានការឧបត្ថម្ភពី ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ៕
