ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយុទ្ធពលខេមរៈភូមិន្ទ និងជាមេបញ្ជាការកងទ័ពជើងគោក បានអញ្ជើញជាអធិបតីភាពក្នុងពិធីបញ្ចុះខណ្ឌសីមាព្រះវិហារថ្មី និងសម្ពោធសមិទ្ធផលនានា ក្នុងវត្តដងទង់ ស្ថិតក្នុងស្រុកដងទង់ ខេត្តកំពត កាលពីថ្ងៃទី១៥ ខែកុម្ភៈ។
ក្នុងឳកាសអញ្ជើញជាអធិបតីភាពក្នុងពិធីបញ្ចុះខណ្ឌសីមា ព្រះវិហារថ្មី និងសម្ពោធសមិទ្ធិផលនានានោះ ឯកឧត្តម ឧត្តមសេនីយ៍ឯក ហ៊ុន ម៉ាណែត បានបញ្ជាក់ថា ការដឹកនាំដោយធម៌គឺសំខាន់ណាស់ ស្របពេលដែលរាជរដ្ឋាភិបាលកម្ពុជាបច្ចុប្បន្ន ដឹកនាំដោយផ្អែកលើគោលការណ៍នេះ ធ្វើឱ្យប្រជាពលរដ្ឋចេះ រស់នៅដោយធម៌ ចេះគោរពគ្នា ចេះស្រឡាញ់គ្នា ចេះជួយយកអាសារគ្នា មានគុណធម៌ និងមានសីលធម៌។ ហើយគោលការណ៍ទាំងនេះមាននៅក្នុងការបង្រៀនរបស់គ្រប់សាសនា ហើយដែលប្រជាពលរដ្ឋខ្មែរមាន សិទ្ធិសេរី ភាពក្នុងការ គោរពប្រតិបត្តិ ប្រកបដោយសុខដុមនីយកម្ម គ្មានជម្លោះដោយសារអំពើជ្រុលនិយមណាមួយនោះឡើយ។
ឯកឧត្តម ឧត្តមសេនីយ៍ឯក បានបញ្ជាក់ទៀតថា ខ្លឹមសារនៃពាក្យអភិវឌ្ឍសម្រាប់សម្តេចតេជោ គឺការ ធ្វើឱ្យប្រជាជនមានជីវភាពរស់នៅល្អប្រសើរ ផ្តោតលើសុខទុក្ខ ការពារផលប្រយោជន៍ដោះស្រាយបញ្ហា ជូនប្រជាជន ដោយបានខិតខំថែរក្សាសន្តិភាព ជាពិសេសជំរុញមន្ត្រីគ្រប់លំដាប់ថ្នាក់ឱ្យជួយ បម្រើប្រជាពលរដ្ឋឱ្យបានល្អ ស្វែងរកទីផ្សារ និងកៀគរអ្នកវិនិយោគបង្កើតការងារជូនប្រជាជន។
គួរបញ្ជាក់ថា ក្នុងសម័យប៉ុលពត វត្តដងទង់ ត្រូវបានរងការបំផ្លិចបំផ្លាញគ្មានសល់ ដូចវត្តដទៃទៀតដែរ ក្នុងប្រទេសកម្ពុជា ។ ប៉ុន្តែនៅក្រោយឆ្នាំ១៩៧៩ នៅសល់តែព្រះពុទ្ធរូបបដិមាករមួយព្រះអង្គ និងចេតិយបុរាណមួយប៉ុណ្ណោះ លុះដល់នៅឆ្នាំ១៩៨៤ ទើបបានចាប់ផ្ដើមកសាងឡើងវិញហើយ ក៏មានការរីកចម្រើននូវសមិទ្ធផលនានាក្នុងទីអារាមវត្តនេះជាបន្តបន្ទាប់រហូតដូចសព្វថ្ងៃនេះ៕
