កំពង់ឆ្នាំង ៖ មហាជននៅខេត្តកំពង់ឆ្នាំងយ៉ាងច្រើនកុះករ បានចូលរួមអបអរសាទរក្បួនដង្ហែព្រះអគ្គិជ័យកីឡានៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី ១២ដែលចេញពីរាជធានីភ្នំពេញ ឆ្ពោះមកកាន់ខេត្តជាប់បឹងទន្លេសាប ។ ក្បួនដង្ហែព្រះអគ្គិជ័យកីឡា បានមកដល់ខេត្តកំពង់ឆ្នាំង នាព្រឹក ថ្ងៃទី២៩ ខែមេសា ឆ្នាំ២០២៣ ។
ក្បួនដង្ហែព្រះអគ្គិជ័យកីឡា បានសម្រាកពិសារអាហារថ្ងៃត្រង់ នៅត្រង់ចំណុចរូបសំណាកដំរីស ព្រំប្រទល់ស្រុករលាប្អៀរ និងក្រុងកំពង់ឆ្នាំង ។ ហើយនៅវេលាម៉ោង១៤រសៀល ក្នុងថ្ងៃដដែលនេះ ក្បួនដង្ហែព្រះអគ្គិជ័យកីឡា នឹងបន្តដំណើរឆ្ពោះទៅកាន់វេទិការប្រារព្វពិធី នៅសួនច្បារវិមានឯករាជ្យ ស្ថិតនៅកណ្តាលក្រុងកំពង់ឆ្នាំង ។ មុននឹងដង្ហែទៅតម្កល់ទុក១យប់ នៅវត្តអារញ្ញការាម ដោយមានការរៀបចំពិធីសាសនា និងការបាញ់កាំជ្រួចអបអរសាទរ នៅពេលរាត្រីផងដែរ ។
នៅក្នុងព្រឹត្តិការណ៍ជាប្រវត្តិសាស្ត្រនេះ រដ្ឋបាលខេត្តកំពង់ឆ្នាំង បានរៀបចំមន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្សានិសិស្ស កម្មករ កម្មការនី និងប្រជាពលរដ្ឋប្រមាណជាង៧ម៉ឺន ដើម្បីចូលរួមអបអរសាទរ នៅពេលដែលក្បួនដង្ហែព្រះអគ្គិជ័យកីឡា មកដល់ភូមិសាស្ត្រ ខេត្តកំពង់ឆ្នាំង ។
គួរបញ្ជាក់ថា ក្រោយព្រះរាជពិធីសុំភ្លើងព្រះអគ្គិអាទិទេព និងព្រះរាជពិធីប្រោសព្រះរាជទានព្រះអគ្គិជ័យកីឡា នៅប្រាសាទអង្គរវត្ត ដែលប្រព្រឹត្តទៅក្រោមរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី២១ ខែមីនា កន្លងទៅ ព្រះអគ្គិជ័យកីឡាត្រូវបានដង្ហែតាមបណ្ដាប្រទេសតំបន់អាស៊ាន បានធ្វើឡើងចាប់ពីថ្ងៃទី២២ ខែមីនា រហូតដល់ថ្ងៃទី២៧ ខែមេសា មុនត្រឡប់ចូលកម្ពុជាវិញ។
ក្រោយបញ្ចប់ពិធីដង្ហែព្រះអគ្គីអាទិទេពកីឡា នៅបណ្ដាប្រទេសតំបន់អាស៊ាន គឺជាពេលវេលារៀបចំពិធីដង្ហែព្រះអគ្គិកីឡា តាមបណ្ដាខេត្តជាប់បឹងទន្លេសាបវិញម្ដង ដោយចេញដំណើរពីរាជធានីភ្នំពេញ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម ចាប់ពីថ្ងៃទី២៩ ខែមេសា រហូតដល់ល្ងាចថ្ងៃទី០៥ ខែឧសភា ពោលគឺចំពេលប្រារព្ធពិធីបើកការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា ជាផ្លូវការតែម្ដង៕
