កំពងឆ្នាំង៖ កាលរសៀលថ្ងៃទី១៩ ខែតុលា ឆ្នាំ២០២២នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង អមដំណើរដោយ អភិបាលរងខេត្ត និងក្រុមការងារ បានចុះពិនិត្យស្ថានភាពស្ពានឈើ ដែលទើបបានជួសជុលរួចរាល់ជាស្ថាពរ ដែលអាចឲ្យប្រជាពលរដ្ឋ និងភ្ញៀវទេសចរណ៍ធ្វើដំណើរឆ្លងកាត់ទៅលេងរមណីយដ្ឋានទឹកធ្លាក់ថ្មក្រាលបានដោយសុវត្ថិភាព។
ក្នុងឱកាសនោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានកោតសរសើរចំពោះឆន្ទៈ និងភាពម្ចាស់ការរបស់បងប្អូនប្រជាពលរដ្ឋនៅសហគមន៍ទេសចរណ៍ទឹកធ្លាក់ថ្មក្រាល និងមន្ត្រីឧទ្យានុរក្សប្រចាំការនៅតំបន់ដែនជម្រកសត្វព្រៃភ្នំឱរ៉ាល់ ស្ថិតក្នុងភូមិកោះខ្ទម្ព ឃុំជៀប ស្រុកទឹកផុស និងអាជ្ញាធរ កងកម្លាំងនៅមូលដ្ឋានទាំងអស់ ដែលបានរួមកម្លាំងគ្នាជួសជុលឡើងវិញស្ពានឈើសម្រាប់ឆ្លងបណ្ដោះអាសន្ន ទៅកាន់រមនីយដ្ឋានទឹកធ្លាក់ថ្មក្រាល ដែលត្រូវបានជំនន់ទឹកភ្លៀងហូរកាត់ផ្ដាច់កាលពីពេលកន្លងទៅនេះ។
ជាមួយគ្នានោះ ឯកឧត្តម អភិបាលខេត្ត និងក្រុមការងារក៏បានបន្តចុះពិនិត្យមើលដំណើរការសាងសង់ទំនប់ចាក់ទឹម នៅតំបន់នោះផងដែរ។
