កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានក្រើនរំលឹក ដល់គណៈអភិបាល និង ក្រុមប្រឹក្សាក្រុងកំពង់ឆ្នាំង ត្រូវបង្កើនការសាមគ្គីភាពផ្ទៃក្នុងឲ្យបានល្អ ដើម្បីប្រសិទ្ធភាពការងារ ។ ការក្រើនរំលឹករបស់ឯកឧត្តម អភិបាលខេត្តបែបនេះ បានធ្វើឡើងនៅក្នុងពិធីប្រកាសចូលកាន់តំណែងជាផ្លូវការ លោក ហ៊ីង ភ័ព្វមិនា ជាអភិបាលក្រុងកំពង់ឆ្នាំង ជំនួសលោក យិន សាវ៉េន ដែលត្រូវតែងតាំងជាអភិបាលរងខេត្ត។
ឯកឧត្តម ស៊ុន សុវណ្ណារិទ្ធិ បានបញ្ជាក់ថា គណៈអភិបាលក្រុង ក្រុមប្រឹក្សាក្រុងត្រូវតែរួមសាមគ្គី ឯកភាពផ្ទៃក្នុងឲ្យបានល្អ ប្រកបដោយឆន្ទះតែមួយក្នុងស្មារតីទទួលខុសត្រូវ ហ្មត់ចត់ និង លើកគោលការណ៍ដឹកនាំលើគ្រប់វិស័យ ។ ក្នុងនោះការងារចំបងមានការងារកំណែទម្រង់រដ្ឋបាលថ្នាក់ក្រោមជាតិគឺការអនុវត្តគោលនយោបាយវិមជ្ឈការនិងវិសហមជ្ឈការ និង ការងារសេដ្ឋកិច្ចសង្គម ។ ជាពិសេសត្រូវយកចិត្តទុកដាក់បង្កើតមុខរបរ និង លើកកម្ពស់ជីវភាពរស់នៅរបស់ប្រជាពលរដ្ឋនៅក្នុងមូលដ្ឋាន ។
ជាមួយគ្នានេះ ឯកឧត្តម អភិបាលខេត្តកំពង់ឆ្នាំង ក៏ដាក់បទបញ្ជាដល់គណៈអភិបាលក្រុង និង មន្ត្រីពាក់ព័ន្ធទាំងអស់ ត្រូវទប់ស្កាត់និងបង្ក្រាបបទល្មើសគ្រប់ប្រភេទឲ្យមានប្រសិទ្ធិភាព ព្រមទាំងលប់បំបាត់ឲ្យអស់នូវល្បែងស៊ីសងគ្រប់ប្រភេទ នៅក្នុងដែនសមត្ថកិច្ចរបស់ខ្លួន ៕
