កំពង់ឆ្នាំង ៖ កូនឈើប្រណិតជាង១ពាន់ដើម ត្រូវបានមន្ទីរកសិកម្មរុក្ខាប្រម៉ាញ់និងនេសាទ ខេត្តកំពង់ឆ្នាំង ធ្វើពិដាំនៅក្នុងបរិវេណវត្តទួលខ្សាច់ ឃុំជ្រៃបាក់ ស្រុករលាប្អៀរ ដោយមានការអញ្ជើញចូលរួម ពីឯកឧត្តម អម សុភា អភិបាលរងខេត្តកំពង់ឆ្នាំង ។
លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់និងនេសាទខេត្តកំពង់ឆ្នាំង បានឲ្យដឹងថា កូនឈើដែលត្រូវដាំនៅក្នុងបរិវេណវត្តទួលខ្សាច់នេះ មានចំនួន១ ១០០ដើម ក្នុងនោះកូនបេងចំនួន២៥០ ដើម,ក្រញូង៣០០ដើម,ធ្នុង២០០ដើម,គគីរ២០០ដើម,និងដើមផ្កាសាគូរាចំនួន២០០ដើម ។
ឯកឧត្តម អម សុភា អភិបាលរងខេត្តកំពង់ឆ្នាំង បានមានប្រសាសន៍ ដោយគូសបញ្ជាក់ថា ការដាំដើមឈើនាពេលនេះ គឺជាការឆ្លុះបញ្ចាំងឲ្យឃើញនូវ ការខិតខំប្រឹងប្រែង យ៉ាងសកម្មរបស់យើងទាំងអស់គ្នា ក្នុងការស្តារគម្របព្រៃឈើឡើងវិញ ឲ្យមានពណ៌បៃតង និងដើម្បីរក្សាបាននូវការបម្រែបម្រួលអាកាសធាតុ ដែលជាបញ្ហាប្រឈម និង ជាកង្វល់រួម ដ៏ធំមួយរបស់ពិភពលោក ដោយសារតែបណ្ដាប្រទេសជឿនលឿនជាច្រើន បានបញ្ចេញ ឧស្ម័នពុល ឧស្ម័នផ្ទះកញ្ចក់ យ៉ាងច្រើនសន្ធឹកសន្ធាប់ ក្នុងនោះកម្ពុជា និង បណ្ដាប្រទេស កំពុងអភិវឌ្ឍន៍ដទៃទៀត បាននិងកំពុងរងគ្រោះ យ៉ាងខ្លាំង និងបានធ្វើឲ្យកំដៅ នៅលើភពផែនដី កើនឡើង។ម្យ៉ាងទៀត ការដាំដើមឈើ បានដើរតួនាទីយ៉ាងសំខាន់ ក្នុងការជួយថែរក្សាដំណើរការ ប្រព័ន្ធអេកូឡូស៊ី តាមរយៈការជួយធ្វើនិយ័តកម្មអាកាសធាតុ ជួយកាត់បន្ថយឥទ្ធិពល អវិជ្ជមាន នៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័ន កាបូនិក ពីបរិយាកាស ៕
