ចម្រៀងមួយបទ កំពុងតែមានការទាក់ចិត្ត ប្រិយមិត្តតែម្តង ដោយសារតែអត្ថន័យ បានចាក់ដោតចំចិត្តអ្នកទស្សនា។ ចម្រៀងនោះក្រើនរំលឹកនូវជីវិតស្នេហាផិតក្បត់ ដែលកើតមានពិតនៅក្នុងសង្គមគ្រួសារមួយ។ ជាពិសេសវាក៏ជាកត្តាជួយរំលឹកដល់ជីវិតប្តីប្រពន្ឋទាំងឡាយ គួរចេះបន្តអោបក្រសោបគ្នា កាន់ចិត្តត្រង់ ដោយមិនត្រូវលួចលាក់រឿងមិនល្អនោះទេ ជៀសវៀងការបែកខ្ញែក។
ការពិតបានទម្លាយចេញមកហើយ ជុំវិញថៅកែដី លោក សីហា ចេញចម្រៀងមួយមានចំនងជើងថា«មេឃក្រឡាប់លើ»។ បំណងចម្បងៗដែលថៅកែរូបនេះ បំផុសឡើង ដើម្បីអោយទស្សនិកជននៅតែចងចាំលោក ឡេង ប៊ុនណាត តារាចម្រៀងមានទេពកោសល្យ និងសំឡេងល្អ ដែលស្ទើរតែបាត់មុខសិល្បៈ អោយនៅចងចាំ។ មួយទៀត ដើម្បីរំលេច បទល្អចេញផ្សាយកន្លងកម្រមានអ្នកស្តាប់ ហើយនេះជាការពញ្ញាក់អារម្មណ៏ម្តងទៀត។ ក្រៅពីនេះលោកសីហា បង្ហាញជំហរមួយទៀតដើម្បីរំលឹកដល់មិត្តម្នាក់ដែលជួបវិបត្តិក្នុងបញ្ហាជីវិត ព្រោះតែភរិយាជាទីស្រឡាញ់បែកគំនិត ទៅជាផិតក្បត់រហូតបណ្តាលអោយ មិត្តរូបនោះឈឺចិត្តរហូតបាត់បង់ជីវិតមិននឹកស្មាន ។
លោកថៅកែ វ័យក្មេង ចេញមកច្រៀងបទខាងលើ ខណៈម្ចាស់បទ លោក ឡេង ប៊ុនណាត បានបាត់មុខឈឹងពីសិល្បៈមិនដឹងថាបច្ចុប្បន្នលោកនៅឯណាឡើយ។ និយាយពីការចេញច្រៀងរបស់លោក សីហា ជាថៅកែដីឡូតិ៍វ័យក្មេង ត្រូវបានគេដឹងថា លោកមានហេតុផលចាំបាច់មួយចំនួន។ ទី១ ដោយសារលោកជាអ្នកចូលចិត្តស្ដាប់រាល់បទរបស់តារាចម្រៀងជើងចាស់ខាងលើ ឬអាចនិយាយបានថា ឡេង ប៊ុនណាត ជា idol របស់លោក។ ទី២ បទចម្រៀង “មេឃក្រឡាប់លើ” ជាបទដ៏ពីរោះ និងកម្រមានអ្នកធ្លាប់បានស្ដាប់ណាស់។ ហេតុផលទី៣ ដែលពិសេសបំផុត គឺលោក ច្រៀងឧទ្ទិសទៅមិត្តម្នាក់ ដែលបានជួបរឿងរ៉ាវ ប្រពន្ធក្បត់ផិត រហូតដល់អស់ជីវិតខ្លួនឯង គួរឲ្យស្រណោះបំផុតថែមទៀត។
លោក សីហា ប្រាប់ថា មិត្តដ៏អភ័ព្វរបស់លោកនោះ ដើមឡើយ គឺជាគ្រូបង្រៀនដ៏ស្លូតបូតមួយរូប មានភរិយា និងកូន២នាក់។ បន្ទាប់ពីរួមរស់ជាមួយគ្នាបានជាកូន ពូនជាចៅ ភរិយារបស់លោក បែរជាបែកឆ្វេងទៅលួចមានសហាយ ហើយនាំមកនេបនិត្យស្នេហ៍ដល់ផ្ទះថែមទៀត។
មិត្តរបស់លោក បានដឹង ព្រោះបានតាមទាន់ម្ដងជាពីរដង ប៉ុន្តែដោយសារជាតិជាមនុស្សស្លូតបូត និងមានការអប់រំ មិត្តរបស់លោកមិនបានប្រព្រឹត្តហិង្សាលើពួកគេឡើយ ប៉ុន្តែបានស្ដីប្រដៅភរិយា ឲ្យឈប់ធ្វើទង្វើបែបនេះទៀត វានាំឲ្យអាម៉ាស់ដល់ខ្លួនឯង និងគ្រួសារ ប៉ុន្តែអ្វីៗមិនអាចកែប្រែបាន ពោលគឺភរិយារូបនោះ នៅតែបន្តទង្វើក្បត់ផិតនេះដដែលជាដដែល។
មិនត្រឹមប៉ុណ្ណឹង ភរិយារូបនោះ នៅបានរួមគំនិតគ្នាជាមួយសហាយ សម្លាប់មិត្តភ័ក្ដិលោក ឲ្យស្លាប់ចោលកូនទាំងពីរដែលលោកស្រឡាញ់ស្មើជីវិតថែមទៀត ដើម្បីដណ្ដើមយកទ្រព្យសម្បត្តិរបស់លោក។ លោកថៅកែ សីហា ប្រាប់ថា ក្រោយមិត្តភ័ក្ដិកើតរឿង ទើបលោកដឹងរឿងដ៏គួរឲ្យសង្វេគនេះ ខណៈកាលនៅរស់មិត្តរូបនេះ បានស្នើឲ្យលោកច្រៀងបទចម្រៀងខាងលើឲ្យស្ដាប់ជារឿយៗ តែលោកមិនចាប់ថ្នាក់ ថាជាសាច់រឿងពិតរបស់គេ។ ដូច្នេះហើយ ទើបលោកចេញមកច្រៀងបទចម្រៀង “មេឃក្រឡាប់លើ” ឧទ្ទិសទៅដល់ដួងវិញ្ញាក្ខន្ធមិត្តលោក និងសូមបួងសួងឲ្យបានទៅដល់ឋានសុគតិភព ហើយជាតិក្រោយកុំអោយអភ័ព្វដូចជាតិនេះទៀត។
