មន្រ្តីជាន់ខ្ពស់ក្រសួងបរិស្ថានព្រមានចាត់វិធានការផ្លូវច្បាប់ចំពោះក្រុមហ៊ុនសាងសង់ផ្លូវណាដែលមិនចូលរួមគាំពារបរិស្ថាន

មន្រ្តីជាន់ខ្ពស់​ក្រសួងបរិស្ថានបានព្រមានចាត់​វិ​ធានការផ្លូវច្បាប់ ចំពោះ​ក្រុមហ៊ុន​សាងសង់​ផ្លូវទាំងឡាយ​ណាដែល​នៅតែ​ល្មើស​មិន​ចូលរួម​គាំពារ​​បរិស្ថាន​ដោយមិនគោរពតាម​បទដ្ឋាន​សាងសង់​ផ្លូវត្រឹមត្រូវ​និងបង្កឱ្យមានការហុយដីធ្វើឱ្យប៉ះពាល់​ដល់ប្រជាពលរដ្ឋ​ដែល​ជា​អ្នក​ធ្វើ​ដំណើរ និង​ប្រជា​ពលរដ្ឋមូលដ្ឋាន​រស់នៅជិត​ទីតាំងសាងសង់។

 

ថ្លែងក្នុងសន្និសីទសារព័ត៌មានស្ដីពីវឌ្ឍនភាពក្រសួងបរិស្ថាន និងបច្ចុប្បន្នភាព នៃ បរិស្ថាន គុណភាពខ្យល់នៅកម្ពុជា កាលពីព្រឹកថ្ងៃទី២៧ ខែ​មករា ឆ្នាំ២០២០ នៅទីស្តីការ​គណៈ​រដ្ឋមន្រ្តី ឯកឧត្តម ហេង ណារ៉េត អគ្គនាយកនៃអគ្គនាយកដ្ឋានគាំពារបរិស្ថាន ក្រសួង​បរិស្ថាន បាន​លើក​ឡើងថា កន្លងមកក្រសួងធ្លាប់ធ្វើការណែនាំ​និងផាកពិន័យចំពោះ​ក្រុមហ៊ុន​សាងសង់ផ្លូវមួយចំនួនដែលមិនបាន​អនុវត្តន៍តាមអ្វី​ដែលជាការណែ​នាំ​របស់ក្រសួងក្នុងការគាំពារបរិស្ថានដែលបង្កផលប៉ះពាល់ដល់សុខភាពប្រជាពលរដ្ឋ។

ឯកឧត្តម បា​នបញ្ជាក់ថា វិធាន​ការផ្លូវច្បាប់នឹង​ត្រូវអនុវត្តន៍​ហើយនៅពេលដែលការជូនដំណឹង និងការណែនាំឱ្យធ្វើការកែ​កំហុស​ឆ្គងមិន​ត្រូវ​បាន​​​គោរព។ ឯកឧត្តមបានបន្ដថា យើងធ្វើជាជំហានៗដែលត្រូវអនុវត្តន៍ ក្នុងនោះផ្តើមចេញពីការពិន័យអន្តរកាល។ ដោយឡែក​ក្នុងករណី​មិន​រាងចាល ​ករណី​​នេះ​​នឹង​ត្រូវទ្វេដង ហើយប្រសិនបើបទល្មើសនេះនៅតែបន្ត គឺអាចឈានទៅដល់ការដក​អាជ្ញាប័ណ្ណ។

ឯកឧត្តមបន្តទៀតថា វិធានការខាងលើនេះ គឺជាវិធានការដែលក្រសួងបាននិងធ្លាប់​អនុវត្តន៍​កន្លងមក។ តែទោះបីជាយ៉ាងណា​ឯកឧត្តមក៏​បាន​អះ​អាង​បន្ថែមថា ក្រសួងនៅ​មិនទាន់ឈានដល់ការដកអាជ្ញាប័ណ្ណក្រុមហ៊ុនដែលទទួលសិទ្ធិសាងសង់ផ្លូវណាមួយនោះទេ ដោយគ្រាន់តែ​ធ្វើការ​ពិន័យតែប៉ុណ្ណោះ ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង