កំពង់ឆ្នាំង ៖ ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រម៉ាញ់និងនេសាទ លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ឆ្នាំង នៅថ្ងៃទី២០ ខែកញ្ញា ឆ្នាំ២០២១នេះ បានចុះពិនិត្យមើលបទល្មើសនេសាទ នៅតាមដងទន្លេសាប ក្នុងភូមិសាស្ត្រខេត្តកំពង់ឆ្នាំង ខេត្តកំពងធំ និង ខេត្តកំពង់ចាម ។
នៅក្នុងឱកាសអញ្ជើញចុះមកកាន់តំបន់ទន្លេសាបនាពេលនេះ ឯកឧត្តម ណៅ ធួក បានដឹកនាំកម្លាំងជំនាញរដ្ឋបាលជលផល កម្លាំងសហគមន៍នេសាទ ខេត្តដែលពាក់ព័ន្ធធ្វើការបង្ក្រាបបទល្មើស ជាក់ស្តែងតែម្តង ។
លោក លី ឡា នាយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រម៉ាញ់ និង នេសាទខេត្តកំពង់ឆ្នាំង បានឲ្យដឹងថា ក្នុងប្រតិបត្តិការបង្ក្រាបបទល្មើសនេសាទនេះ កម្លាំងជំនាញបានសម្រេចរុះរើបំផ្លាញចោលមានរបាំងស្បៃមុង៣៥កន្លែង ប្រវែង២ ៦០០ម៉ែត្រ លូស្បៃមុង៣៥គ្រឿងនិងបានចាក់លែងត្រីចម្រុះទៅក្នុងដែនទឹកធម្មជាតិវិញចំនួន៣០០គីឡូក្រាម ។
នៅក្នុងថ្ងៃដដែលនេះដែរ ឯកឧត្តម ណៅ ធួក រដ្ឋលេខាក្រសួងកសិកម្ម រុក្ខាប្រម៉ាញ់និង នេសាទ បានជួបសំណេះសំណាលជាមួយកម្លាំងយាមកន្លែងអភិរក្សជលផលបឹងប្រា ក្នុងខេត្តកំពង់ឆ្នាំង ដោយបានឧបត្ថម្ភថវិកានិងគ្រឿងឧបភោគបរិភោគមួយចំនួនផងដែរ ៕និវឌ្ឍន៍
