កំពង់ឆ្នាំង៖ ក្នុងគោលបំណងបង្ហាញពីវឌ្ឍន:ភាពនិងសក្តានុពល នៃគម្រោងអភិវឌ្ឍន៍ដីឡូត៍នៅក្នុងខេត្តកំពង់ឆ្នាំង លោក អ៊ី សានី ដែលជាអគ្គនាយកនិងថ្នាក់ដឹកនាំគម្រោង បានរៀបចំពិធីសំណេះសំណាលនិងជួបជុំពិសាអាហារសាមគ្គីមួយ នៅលើទីតាំងគម្រោងផ្ទាល់ស្ថិតនៅក្នុងភូមិប៉ាហ៊ី ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង ។
នៅក្នុងពិធីនេះដែរ មានការអញ្ជើញចូលរួមជាភ្ញៀវកិត្តិយស ពីសំណាក់ឯកឧត្តម ឧត្តមសេនីយ៍ ពៅ សុខា មេបញ្ជាការរងកងទ័ពជើងគោកនិងជាមេបញ្ជាការកាំភ្លើងធំ លោកឧត្តមសេនីយ៍ត្រី គុជ សុវណ្ណារិទ្ធ មេបញ្ជាការរងកាំភ្លើងធំ លោកឧត្តមសេនីយ៍ត្រី ខៃ ប៊ុនធឿន មេបញ្ជាការដ្ឋានអង្គរក្ស ក្រុមការងារគម្រោង និង អតិថិជនជាច្រើននាក់ចូលរួមផងដែរ។
លោក សុខ គ្រី ប្រធានទីផ្សារ របស់ក្រុមហ៊ុន បានឲ្យដឹងថា គម្រោងអភិវឌ្ឍន៍ដីឡូត៍ អ៊ីសានី នៅក្នុងខេត្តកំពង់ឆ្នាំងបានបើកដំណើរការលក់កាល ពីថ្ងៃទី១ ខែមិថុនា ឆ្នាំ២០១៩ មានទីតាំងស្ថិតក្នុងភូមិប៉ាហ៊ី ឃុំអណ្តូងស្នាយ ស្រុករលាប្អៀរ ដែលលាតសន្ធឹងលើផ្ទៃដីសរុបចំនួន៩៥ហិចតា ។
គម្រោងបានរៀបចំផ្លូវជា៣ប្រភេទ គឺផ្លូវក្រាលថ្មមិចទទឹង១០ម៉ែត្រ,ផ្លូវក្រាលថ្មមិចទទឹង១២ម៉ែត្រ,ផ្លូវមេក្រាលកៅស៊ូទទឹង១៨ម៉ែត្រ និងមានរៀបជា សួនកណ្តាលផងដែរ ។
លោកប្រធានទីផ្សារ បានឲ្យដឹងថា ក្រុមហ៊ុននឹងរៀបចំឲ្យមានបណ្តាញភ្លើងអគ្គិសនី សាងសង់ផ្សារលក់ដូរលើផ្ទៃដីទំហំ២ហិកតា ធ្វើសួនលំហែកាយលើផ្ទៃដីទំហំ៤ហិកតា និង មានសាងសង់ផ្ទះល្វែងនៅលើផ្ទៃដីទំហំ៥ហិកតា ដើម្បីបំពេញតម្រូវការរស់នៅបែបស្តង់ដារទៀតផង ។
លោក សុខ គ្រី បានឲ្យដឹងទៀតថា ដោយមានចក្ខុវិស័យចង់ប្រែក្លាយតំបន់នេះឲ្យទៅជាតំបន់សេដ្ឋកិច្ចដ៏មានសក្តានុពល ក្រុមហ៊ុន បានសហការជាមួយដៃគូរបរទេសបង្កើតជារោងចក្រលើផ្ទៃដី២០ហិកតា នៅក្នុងឆ្នាំ២០២២ ដែលជាឱកាសផ្តល់ការងារសម្រាប់កូនចៅប្រជាពលរដ្ឋពី៥០០ ទៅ១០០០នាក់ ។
នៅក្នុងឱកាសនោះផងដែរលោក អ៊ី សានី អគ្គនាយកគម្រោងអភិវឌ្ឍន៍ដីឡូត៍ខេត្តកំពង់ឆ្នាំង បានសំដែងនូវអំណរអរគុណ យ៉ាងជ្រាលជ្រៅ និងរីករាយ បំផុតជូនចំពោះឯកឧត្តម លោកជំទាវ លោក លោកស្រី ដែលបានអញ្ជើញជាភ្ញៀវកិត្តិយសនិងបានលើកឡើងអំពីគម្រោងអភិវឌ្ឍន៍ដីឡូត៍ នៅក្នុងខេត្តកំពង់ឆ្នាំងផងដែរ ៕
