កំពង់ឆ្នាំង ៖ តាមរយះទំព័រហ្វេកបុកនៅរសៀលថ្ងៃទី១០ ខែកក្កដា នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានអំពាវនាវដល់ប្រជាពលរដ្ឋនៅក្នុងខេត្តកំពង់ឆ្នាំងទាំងអស់ ឲ្យបន្តយកចិត្តទុកដាក់អនុវត្តន៍វិធានការ ៣កុំ ៣ការពារ ដើម្បីការពារខ្លួនពីជំងឺកូវីដ-១៩ ។
ជាមួយគ្នានោះ ឯកឧត្តម ស៊ុន សុវណ្ណារិទ្ធិ ក៏បានណែនាំថា ក្នុងករណីមានរោគសញ្ញាសង្ស័យ ឬមានការជាប់ពាក់ព័ន្ធជាមួយអ្នកវិជ្ជមាន សូមផ្ដល់ដំណឹងជាបន្ទាន់មកអាជ្ញាធរ ឬសមត្ថកិច្ចមូលដ្ឋានដែលនៅជិតបំផុត ដើម្បីចាត់វិធានការទាន់ពេលវេលាកាត់ផ្ដាច់ប្រភពចម្លង និងបង្ការទប់ស្កាត់ការរីករាលដាលធ្ងន់ធ្ងរទៅក្នុងសហគមន៍ និងជៀសវាងគេចវេសពីការយកសំណាកពីសំណាក់ក្រុមការងារជំនាញនៃមន្ទីរសុខាភិបាល។
ជំនួសមុខឲ្យក្រុមប្រឹក្សាខេត្ត និងគណៈអភិបាលខេត្ត ឯកឧត្តមក៏ថ្លែង អំណរគុណ និងកោតសរសើរចំពោះអាជ្ញាធរ និងសមត្ថកិច្ច គ្រប់លំដាប់ថ្នាក់ ពិសេស ក្រុមគ្រូពេទ្យគ្រប់ផ្នែក ដែលបានលះបង់កម្លាំងកាយចិត្ត ដោយមិនខ្លាចនឿយហត់ រួមគ្នាប្រយុទ្ធនឹងជំងឺ កូវីដ-១៩។
