កំពង់ឆ្នាំង ៖អង្គការសង្គមស៊ីវិលក្នុងខេត្តកំពង់ឆ្នាំងបានចូលរួមវេទិកាសន្ទនា ក្រោមប្រធានបទស្ដីពី « ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល » ដែលវេទិកាសន្ទនានេះរៀបចំដោយវេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្រ្តី កាលពីថ្ងៃទី១៧ ខែសីហា ឆ្នាំ២០២៦ ។
ឯកឧត្តម ប៉ៃ សំបូរ អគ្គលេខាធិការ នៃអគ្គលេខាធិការដ្ឋានវេទិកាសម្ព៏ន្ធសង្គមស៊ីវិល បានកោតសរសើរចំពោះកិច្ចសហការយ៉ាងជិតស្និទ្ធរវាងអាជ្ញាធរមូលដ្ឋាននិងអង្គការសង្គមស៊ីវិលក្នុងខេត្តកំពង់ឆ្នាំង ដែលបានរួមគ្នាជំរុញការអភិវឌ្ឍសេដ្ឋកិច្ច សង្គម និងលើកកម្ពស់សុខុមាលភាពនិងជីវភាពរស់នៅរបស់ប្រជាពលរដ្ឋប្រកបដោយបរិយាបន្ន។
ឯកឧត្តមអគ្គលេខាធិការ បានគូសបញ្ជាក់អំពីការយកចិត្តទុកដាក់ខ្ពស់របស់រាជរដ្ឋាភិបាល ចំពោះអង្គការសង្គមស៊ីវិលដែលជាដៃគូមិនអាចខ្វះបានក្នុងការអភិវឌ្ឍប្រទេសជាតិលើគ្រប់វិស័យ ស្របតាមគោលនយោបាយនិងយុទ្ធសាស្រ្តអភិវឌ្ឍន៍ជាតិ ក្រោមការដឹកនាំប្រកបដោយគតិបណ្ឌិត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
ឯកឧត្តមក៏បានលើកទឹកចិត្តឱ្យអង្គការសង្គមស៊ីវិលក្នុងមូលដ្ឋានជួយផ្សព្វផ្សាយជំរុញឱ្យយុវជនចុះឈ្មោះចូលរៀនថ្នាក់បច្ចេកទេស និងវិជ្ជាជីវៈនៅវិទ្យាស្ថានជាតិពហុបច្ចេកទេសខេត្តកំពង់ឆ្នាំង ដើម្បីទទួលបានឱកាសការងារកាន់តែល្អប្រសើរនៅតាមក្រុមហ៊ុន សហគ្រាសក្នុងមូលដ្ឋាន ដែលអាចជួយលើកកម្ពស់ជីវភាពរស់នៅកាន់តែល្អប្រសើរ។
លោក ជា សុខរិទ្ធិ អភិបាលរងខេត្តកំពង់ឆ្នាំង បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចសហការយ៉ាងជិតស្និទ្ធរវាងអាជ្ញាមូលដ្ឋានគ្រប់លំដាប់ថ្នាក់ និងអង្គការសង្គមស៊ីវិល ដែលបានចូលរួមពង្រឹងកិច្ចសហប្រតិបត្តិការលើគ្រប់វិស័យ រួមទាំងការលើកកម្ពស់លទ្ធិប្រជាធិបតេយ្យនិងអភិបាលកិច្ចនៅថ្នាក់មូលដ្ឋាន។
លោកក៏បានលើកទឹកចិត្តឱ្យអង្គការសង្គមស៊ីវិលទាំងអស់បន្តសហការឱ្យកាន់តែជិតស្និទ្ធដើម្បីរួមគ្នាលើកកម្ពស់ការអភិវឌ្ឍសេដ្ឋកិច្ច-សង្គម និងបន្តពង្រឹងភាពជាដៃគូល្អក្នុងការគាំទ្រអនុវត្តយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ស្របតាមកម្មវិធីនយោបាយនិងយុទ្ធសាស្រ្តអភិវឌ្ឍន៍នានា ដើម្បីរក្សាបាននូវសុខសន្តិភាព ស្ថិរភាពរឹងមាំ ការគោរពសិទ្ធិសេរីភាពស្របតាមគោលការណ៍នៃលទ្ធិប្រជាធិបតេយ្យ និងការអភិវឌ្ឍប្រកបដោយបរិយាបន្ន ក៏ដូចជាជំរុញការអនុវត្តគោលនយោបាយភូមិ-ឃុំមានសុវត្ថិភាព និងការអភិវឌ្ឍលើគ្រប់វិស័យនៅថ្នាក់មូលដ្ឋាន។
អង្គវេទិកាក៏បានបើកទូលាយឱ្យតំណាងអង្គការសង្គមស៊ីវិលលើកយកនូវបញ្ហាប្រឈមនិងសំណូមពរ មកជជែកពិភាក្សាដោយត្រង់ទៅត្រង់មក ដើម្បីរួមគ្នាស្វែងរកដំណោះស្រាយនិងពង្រឹងកិច្ចសហការល្អជាមួយគ្នា។ ជាលទ្ធផល បញ្ហាប្រឈមនិងសំណូមពរមួយចំនួន ត្រូវបានដោះស្រាយជាក់ស្តែងក្នុងកិច្ចពិភាក្សាដោយផ្ទាល់ និងទទួលបានការសាទរពីអង្គវេទិកាទាំងមូល។
ក្នុងវេទិកាសន្ទនានេះផងដែរ លោក ហ៊ាង សុបញ្ញា អ្នកស្រាវជ្រាវ នៃបណ្ឌិត្យសភាបច្ចេកវិទ្យាឌីជីថលកម្ពុជា បានចូលរួមធ្វើបទបង្ហាញស្តីពី «ការយល់ដឹងអំពីអក្ខរកម្មឌីជីថលនិងសុវត្ថិភាពតាមប្រព័ន្ធបច្ចេកវិទ្យាសម្រាប់អង្គការសង្គមស៊ីវិល» ក្រោមការសម្របសម្រួលពីវេទិសម្ព័ន្ធសង្គមស៊ីវិល (វ ស ស)ដើម្បីចូលរួមផ្សព្វផ្សាយនិងលើកកម្ពស់បរិវត្តកម្មឌីជីថលនិងការយល់ដឹងអំពីគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ ៕
អត្ថបទ ហឹង ចូច, រូបថត សន គន្ធនិវឌ្ឍន៍
