កំពង់ឆ្នាំង ៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមដំណើរដោយ លោកជំទាវ ប៊ន សុភី អភិបាលរងខេត្តនិងលោក លោកស្រី ប្រធានមន្ទីរអង្គភាពជុំវិញខេត្ត ព្រមទាំងមានការអញ្ជើញចូលរួម ពីសំណាក់ ក្រុមការងារគម្រោងសាងសង់ផ្លូវជាតិលេខ៥ ដឹកនាំដោយលោក ឈឹម ផល្លា ប្រធាននាយកដ្ឋានផ្លូវថ្នល់ នៃក្រសួងសាធារណការនិងដឹកជញ្ជូន និង ជាប្រធានគម្រោងស្ថាបនាផ្លូវជាតិលេខ៥ នៅថ្ងៃទី១៥ ខែកក្កដា ឆ្នាំ២០២១នេះ បានអញ្ជើញ ចុះពិនិត្យមើលអំពីដំណើរការសាងសង់រូបសំណាកឆ្នាំង នៅរង្វង់មូលថ្មី និង ដាំដើមត្របែកព្រៃ តាមបណ្តោយផ្លូវភ្លោះ លើទ្រូងផ្លូវ ស្ថិតនៅឃុំជ្រៃបាក់ស្រុករាលប្អៀរ ខេត្តកំពង់ឆ្នាំង ។
លោក ឈឹម ផល្លា ប្រធាននាយកដ្ឋានផ្លូវថ្នល់ នៃក្រសួងសាធារណការនិងដឹកជញ្ជូននិងជាប្រធានគម្រោងស្ថាបនាផ្លូវជាតិលេខ៥ ចំពោះគម្រោងធ្វើឱ្យប្រសើរឡើងកំណាត់ផ្លូវជាតិលេខ៥ភាគខាងត្បូងសាងសង់ចាប់ពីព្រែកក្តាម(ខេត្តកណ្តាល) ដល់ធ្លាម្អម (ពោធិ៍សាត់)មានប្រវែងសរុប១៣៥,២៤គីឡូម៉ែត្រ ដោយឆ្លងកាត់ខេត្តចំនួន០៣ គឺខេត្តកណ្តាល ខេត្តកំពង់ឆ្នាំង និង ខេត្តពោធិ៍សាត់ ជាផ្លូវក្រាលបេតុងកៅស៊ូAC ចែកជា៤គន្លងទៅ២គន្លងមក គ្រោងរយៈពេលសាងសង់ចំនួន៤៨ខែ ។
សម្រាប់ខេត្តកំពង់ឆ្នាំង មានផ្លូវវាងចំនួន៣ ទីតាំង ដែលផ្លូវវាងទី១ នៅត្រង់ចំណុចភូមិផ្សារត្រាច ឃុំលង្វែក ស្រុកកំពង់ត្រឡាច ព្រំប្រទល់ខេត្តកំពង់ឆ្នាំងនិងខេត្តកំពង់ស្ពឺ សាង់សង់សួនច្បារ និងរូបសំណាកព្រះគោព្រះកែវ ។ ទីតាំងទី២ នៅក្នុងឃុំជ្រៃបាក់ ស្រុករលាប្អៀរ ត្រង់ចំណុចផ្លូវបំបែកវៀងក្រុងកំពង់ឆ្នាំង សាង់សង់សួនច្បារ និង រូបសំណាកឆ្នាំង ។ ទីតាំងទី៣ ក្នុងឃុំពង្រ ស្រុករលាប្អៀរ ត្រង់ចំណុចចុងផ្លូវវាងក្រុងកំពង់ឆ្នាំង សាងសង់សួនច្បារ និង រូបនារីស្មូនឆ្នាំង។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នំាង បានមានប្រសាសន៍ថា ការចុះកមកពិនិត្យរង្វង់មូលសំណាកឆ្នាំង គឺដើម្បីពិនិត្យមើលអំពីដំណើរការសាងសង់ តាមគម្រោង នៃកិច្ចសន្យា ដើម្បីដាក់ពណ៌លើរូបសំណាកឆ្នាំង ដើម្បីបង្កើននូវសោភ័ណភាព និង ប្រណិតភាពឱ្យបានសក្តិសម ជានិមិត្តរូបឆ្នាំង ។
ឯកឧត្តមអភិបាលខេត្ត បានឲ្យដឹងថា រូបសំណាកឆ្នាំងមានកម្ពស់១៤ម៉ែត្រ(រួមទាំងជើងទម្រ) រំលេចដោយក្បូរក្បាច់រចនាតាមក្បួនខ្នាតស្ថាបត្យកម្មត្រឹមត្រូវ និងមានសួនច្បារព័ទ្ធជុំវិញ។ ដែលរហូតមកដល់ពេលនេះរូបសំណាកឆ្នាំង បានសាងសង់សម្រេចបានជាង៩០ភាគរយហើយ ដែលគ្រោងនឹងបញ្ចប់នាពេលខាងមុខនេះ ។
ឯកឧត្តម ស៊ុន សិវណ្ណារិទ្ធ បានបញ្ជាក់ទៀតថា ក្រោយពីផ្លូវនេះ សាងសសង់រួចរាល់ នឹង ធ្វើឱ្យខេត្តកំពង់ឆ្នាំង ក្លាយជាខេត្ត ដែលមានសក្តានុពលផ្នែកវិស័យទេសចរណ៍ ដែលមានបរិស្ថានស្អាត ទាក់ទាញបាននូវភ្ញៀវជាតិនិងអន្តរជាតិមកលេងកំសាន្ត ហើយខេត្តនឹងមានគម្រោងបន្ថែមទៀតដើម្បីទាក់ទាញអ្នកវិនិយោគិនជាតិ និង អន្តរជាតិផងដែរ ។
ក្នុងឱកាសនោះ ឯកឧត្តម បានអញ្ជើញដាំដើមផ្កាត្របែកព្រៃលើគន្លងផ្លូវដើម្បីលម្អសោភណភាពតាមដងផ្លូវផងដែរ ។ ឯកឧត្តម បានសំណូមពរឱ្យប្រជាពលរដ្ឋដែលរស់នៅអមតាមដងផ្លូវនេះចូលរួមថែរក្សា ការពារ ដោយមិនត្រូវសាងសង់រំលោភលើចិញ្ចើមផ្លូវសារធារណរបស់រដ្ឋជាដាច់ខាត ៕
អត្ថបទនិងរូបភាព៖ និវឌ្ឍន៍
