ក្រសួងព័ត៌មាន បានចាប់ផ្តើមបើកយុទ្ធនាការចាក់ថ្នាំបង្ការជំងឺកូវីដ-១៩ សម្រាប់មន្រ្តីរាជការក្រសួងព័ត៌មាន និងអ្នកសារព័ត៌មានទូទាំងប្រទេសចំនួនប្រមាណជាង៥ ពាន់នាក់ នៅថ្ងៃទី០១ ខែមេសានេះ ដែលធ្វើឡើងនៅក្នុងបរិវេនទីស្តីការក្រសួងព័ត៌មាន ។យុទ្ធការចាក់វ៉ាក់សាំងបង្ការជំងឺកូវីដ១៩ ក្នុងក្របខណ្ឌក្រសួងព័ត៌មាននៅថ្ងៃដំបូងនេះ គឺចាក់ជូនថ្នាក់ដឹកនាំ ទីប្រឹក្សា និងមន្រ្ដីរាជការក្រសួងព័ត៌មាន។
បើតាម ឯកឧត្ដម ទន់ សារ៉ាត រដ្ឋលេខាធិការ និងជាអនុប្រធានអនុគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌក្រសួងព័ត៌មាន បានបញ្ជាក់ថា ការចាក់វ៉ាក់សាំង គឺធ្វើឡើងកំណត់ចំនួនមនុស្សទៅតាមថ្ងៃ និងការកំណត់ពេលវេលាជាក់លាក់ ដោយធ្វើទៅតាមចំនួនមនុស្សនៅក្នុងអគ្គនាយកដ្ឋាននីមួយៗនិង តាមបញ្ជីឈ្មោះអ្នកសារព័ត៌មានដែលអង្គភាពសារព័ត៌មានបានបញ្ជូនឈ្មោះមកក្រសួងព័ត៌មានរួចរាល់ ដើម្បីកាត់បន្ថយការប្រមូលផ្ដុំគ្នាច្រើន រក្សាឱ្យមានគម្លាតសុវត្ថិភាពអនុវត្ដន៍ទៅតាមវិធានការរបស់ក្រសួងសុខាភិបាល ។
ឯកឧត្តម បានបន្ថែមថា ក្រសួងព័ត៌មាន បានត្រៀមរៀបចំទីកន្លែងចាក់វ៉ាក់សាំង ដោយមានចាប់ពីកន្លែងរង់ចាំ កន្លែងពិភាក្សាជាមួយគ្រូពេទ្យ កន្លែងសង្គ្រោះ បន្ទប់គ្រូពេទ្យចាក់វ៉ាក់សាំង ព្រមទាំងបានចាត់ចែងក្រុមការងាររៀបចំទៅតាមមុខងារ តួនាទី និងការទទួលខុសត្រូវតាមផ្នែកនីមួយៗ សម្រាប់ការចាក់វ៉ាក់សាំងបង្ការជំងឺកូវីដ១៩ ជូនមន្រ្តីរាជការក្រសួង បុគ្គលិក អ្នកសារព័ត៌មានពីអង្គភាពសារព័ត៌មាន និងក្នុងវិស័យផ្សព្វផ្សាយ វិទ្យុ ទូរទស្សន៍ អនឡាញ ។
ជាមួយគ្នានេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាប្រធានកិត្តិយសអនុគណៈកម្មការចំពោះកិច្ចចាក់ វ៉ាក់សាំង ក្របខ័ណ្ឌក្រសួងព័ត៌មាន ក៏បានអញ្ជើញពិនិត្យដំណើរការចាក់វ៉ាក់សាំងបង្ការជំងឺកូវីដ-១៩ សម្រាប់ថ្នាក់ ដឹកនាំមន្ត្រីរាជការក្រសួងព័ត៌មាន និងបណ្តាប្រព័ន្ធផ្សព្វផ្សាយឯកជន តាមគោលការណ៍ស្ម័គ្រចិត្ត ដែលបានចាប់ផ្តើម នាព្រឹកថ្ងៃទី០១ ខែមេសា ឆ្នាំ២០២១ នេះផងដែរ។
តាមរបាយការណ៍របស់អគ្គនាយកដ្ឋានព័ត៌មាន និងសោតទស្សន៍ក្រសួងព័ត៌មាន បានបង្ហាញថា ការចុះឈ្មោះរបស់ថ្នាក់ដឹកនាំ មន្រ្ដីរាជការ ក្រសួងព័ត៌មាន និងអ្នកសារព័ត៌មានដែលស្ម័គ្រចិត្ដចាក់វ៉ាក់សាំងការពារជំងឺកូវីដ១៩ មានចំនួនជាង៥ពាន់នាក់ ក្នុងនោះថ្នាក់ដឹកនាំ និងមន្រ្ដីរាជការក្រសួងព័ត៌មានសរុបចំនួនជាង១ពាន់នាក់ និងអ្នកសារព័ត៌មានសរុបចំនួនជាង៤ពាន់នាក់ ដែលមកពីផ្នែកកាសែត និងទស្សនាវដ្ដីចំនួន៣២អង្គភាព ផ្នែកទូរទស្សន៍ចំនួន១៧ ស្ថានីយ ផ្នែកវិទ្យុចំនួន២៥ស្ថានីយ ផ្នែកគេហទំព័រចំនួន៩៩អង្គភាព ការិយាល័យសារព័ត៌មានបរទេសចំនួន០៤អង្គភាព និងក្រុមហ៊ុន សមាគម និងរោងពុម្ពផ្សេងៗដែលធ្វើការក្នុងវិស័យព័ត៌មាន៕
