កំពង់ឆ្នាំង៖ បើតាមការបញ្ជាក់ពីលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង អោយដឹងថា កាលពីយប់នៅថ្ងៃទី២៤ ខែមីនា ឆ្នាំ២០២១នេះ ក្រុមគ្រូពេទ្យបានបញ្ជូនស្ត្រីវិជ្ជមានកូវីដ១៩ម្នាក់ ពីស្រុកកំពង់ត្រឡាចមកព្យាបាលនៅភ្នំពេញទាំងយប់ បន្ទាប់ពីស្ត្រីមា្នក់នេះបាននាំមិត្តភក្តិមកលេងស្រះចិញ្ចឹមត្រីមួយកន្លែងនៅក្នុងស្រុកកំពង់ត្រឡាច ។
ស្ត្រីវិជ្ជមានកូវីដ១៩ម្នាក់នោះ មានឈ្មោះ ហីន ចាញ់សុធា អាយុ២៨ឆ្នាំ រស់នៅភូមិស្វាយប៉ាក សង្កាត់ស្វាយប៉ាក ខ័ណ្ឌឬស្សីកែវ ក្រុងភ្នំពេញ បាននាំមិត្តភក្តិមកលេងស្រះចិញ្ចឹមត្រីរបស់បងស្រីនៅក្នុងភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង។
ក្រោយពីដឹងព័ត៌មានភ្លាម ឯកឧត្តអភិបាលខេត្ត និងលោកប្រធានមន្ទីរសុខាភិបាលខេត្ត បានអោយឡានពេទ្យដឹកយកស្រ្តីវិជ្ជមានកូវីដ១៩នោះ យកទៅព្យាបាលនៅសណ្ឋាអាំងទែកុងទីណង់តាល់ទាំងយប់ ចំណែកបុរសជាមិត្តភក្តិរបស់ស្ត្រីនោះ បានដាក់អោយធ្វើចត្តាឡីស័កនៅកន្លែងចិញ្ចឹមត្រីនោះ និងមានការយាមកាមយ៉ាងតឹងរឹងពីសមត្ថកិច្ចផងដែរ។
មន្ត្រីជំនាញ អះអាងថា នៅក្នុងស្រុកកំពង់ត្រឡាចវិញ មិនមានអ្នកណាពាក់ព័ន្ធនឹងបុគ្គលទាំង២នាក់ខាងលើនេះទេ ដោយសារពួកគេមកពីភ្នំពេញជិះឡានផ្ទាល់ខ្លួន។ បើទោះបីយ៉ាងណា អាជ្ញាធរក៏បន្តស្រាវជ្រាវក្រែងមានអ្នកពាក់ព័ន្ធនឹងបុគ្គលទាំងពីររូបនេះ៕ 
