កំពង់ឆ្នាំង៖ ទីតាំងផលិតស្រាជាង៥០០កន្លែង និង កន្លែងលក់ស្រាស ស្រាថ្នាំជាង១០០០កន្លែង នៅទូទាំងខេត្តកំពង់ឆ្នាំង ត្រូវបានបិទទាំងស្រុង ក្នុងនោះមនុស្ស៦នាក់ ក៏ត្រូវបានឃាត់ខ្លួនបញ្ជូនទៅកាន់តុលាការ ដើម្បីចាត់ការតាមផ្លូវច្បាប់ផងដែរ ។ នេះបើតាមការបញ្ជាក់របស់លោកអ៊ៀរ ប៊ុនធឿន ស្នងការរង និង ជាអ្នកនាំពាក្យ នៃស្នងការដ្ឋាននគរបាលខេត្តកំពង់ឆ្នាំង ដែលបានបញ្ជាក់ប្រាប់នៅក្នុងសន្និសិទ្ធសារព័ត៌មានមួយ ដែលបានប្រារព្វធ្វើស្នងការដ្ឋាននគរបាលខេត្តនាព្រឹកថ្ងៃទី១៤ ខែធ្នូ ឆ្នាំ២០២០ ។
លោក អ៊ៀរ ប៊ុនធឿន បានបញ្ជាក់ថា ការបិទទីតាំងផលិតនិងលក់ស្រាសរដ៏ច្រើនសន្ធឹកសន្ធាប់នេះ គឺបន្ទាប់ពីមានផ្ទុះករណីពុលស្រាស ស្រាថ្នាំ បណ្តាលឲ្យមនុស្សស្លាប់ជាបន្តបន្ទាប់រហូតដល់៨នាក់ និង អាការៈពុលធ្ងន់និងស្រាលប្រមាណជាងមួយររយនាក់ កាលពីចុងខែវិច្ឆិកាកន្លងទៅ។
លោកស្នងការរងបានបញ្ជាក់ឲ្យដឹងទៀតថា ក្រោយពីព្រឹត្តិការណ៍ផ្ទុះករណីពុលស្រានេះ សមត្ថកិច្ចបានធ្វើការស្រាវជ្រាវ និងដកហូតបានស្រាស ៣៨៩៥លីត្រ ស្រាសច្រកស្រេចមានចំនួន ៥៣២កាន មេស្រាស៧៥លីត្រ មេតំបែ១កញ្ចប់ មេស្រាកាច់រួចកន្លះលីត្រ ស្រាច្រកដបទឹកសុទ្ធ៥៩ដប ស្រាច្រកកែវជ័រចំនួន៨០កែវជ័រនិង មេកាច់ស្រាចំនួន២១ខាប់ ។
លោក អ៊ៀរ ប៊ុនធឿន បានឲ្យដឹងទៀតថា ករណីពុលស្រាដែលធ្វើឲ្យមនុស្សស្លាប់នេះ គឺត្រូវបានស្ថាប័នជំនាញបញ្ជាក់ថា ស្រានោះមានកម្រិតមេតាណុលខ្ពស់ ។
