តុល្យការចុងក្រោយជនរងគ្រោះដែលក្រុមការងារបានជួយសង្គ្រោះយកចេញពីគំនរបាក់បែកនៃអគាររលំមានចំនួនសរុប៥៩នាក់ ក្នុងនោះបាត់ បង់ជីវិតចំនួន៣៦នាក់ និងរងរបួស២៣នាក់។ នេះបើយោងតាមសេចក្តីប្រកាសព័ត៌មានជុំវិញការបិទបញ្ចប់ជាស្ថាពរនៃប្រតិបត្តិការរុករកជនរងគ្រោះនៅក្រោមគំនរបាក់បែកអគាររលំរបស់រដ្ឋបាលខេត្តកែប នៅរសៀលថ្ងៃទី០៥ ខែមករា ឆ្នាំ២០២០នេះ ។
រដ្ឋបាលខេត្តកែប បានបញ្ជាក់ថា ប្រតិបត្តិការនៃការរុករកជនរងគ្រោះប្រើរយៈពេលជិត០២ថ្ងៃ (៤៣ម៉ោង២០នាទី) ចាប់ពីថ្ងៃទី០៣ ដល់ថ្ងៃទី០៥ ខែមករា ឆ្នាំ២០២០ ត្រូវបានបិទបញ្ចប់ជាស្ថាពរត្រឹមវេលាម៉ោង១១៖៣៥ថ្ងៃត្រង់ នាថ្ងៃទី០៥ ខែមករា ឆ្នាំ២០២០។
រដ្ឋបាលខេត្តកែប បញ្ជាក់ទៀតថា ចំពោះជនរងគ្រោះបាត់បង់ជីវិត ត្រូវបានក្រុមគ្រួសារមកបំពេញឯកសារ ដើម្បីទទួលយកសពទៅធ្វើបុណ្យ តាមប្រពៃណី។
រដ្ឋបាលខេត្ត និងប្រជាពលរដ្ឋទូទាំងខេត្តកែប ក៏បានគោរពថ្លែងអំណរគុណ យ៉ាងជ្រាលជ្រៅជាទីបំផុត ចំពោះវត្តមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានអញ្ជើញចុះត្រួតពិនិត្យដឹកនាំបញ្ជាផ្ទាល់នៅទីតាំងកើតហេតុរយៈពេល២ថ្ងៃ ២យប់ និងបានឧបត្ថម្ភជាសម្ភារៈ ថវិកាផងនោះ គឺពិតជាបានបង្ហាញនូវការ យកចិត្តទុកដាក់ខ្ពស់ ចំពោះសុខទុក្ខរបស់បងប្អូនកម្មករជាជនរងគ្រោះ និងក្រុមគ្រួសារជនរងគ្រោះ ហើយក៏ជាការលើកទឹកចិត្តដ៏ធំធេងដល់បងប្អូន គ្រប់ក្រុមការងារទាំងអស់ ដែលចូលរួមក្នុងបេសកកម្មរុករកជនរងគ្រោះដោយឧបទ្ទវហេតុដ៏ សែនអាក្រក់នេះ។
ជាមួយគ្នានេះ រដ្ឋបាលខេត្តកែប ក៏គោរពថ្លែងអំណរគុណ ចំពោះក្រុមការងារជួយសង្គ្រោះទាំងអស់ ដែលបានចំណាយពេលវេលាប្រើអស់ កម្លាំងកាយ កម្លាំងចិត្ត ក្នុងការជួយសង្គ្រោះជនរងគ្រោះចេញពីគំនរបាក់បែកនៃអគារដួលរលំនេះ៕
