លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តកំពង់ឆ្នាំង បានជំរុញនិងលើកទឹកចិត្ត ដល់កសិករអោយបណ្តុះផ្សិតអំបោះលក់ ខណៈផ្សិតអំបោះកំពុងមានតម្រូវការច្រើននៅលើទីផ្សារ។ការជំរុញរបស់ប្រធានមន្ទីរដូចនេះ បាន ធ្វើឡើងនៅក្នុងដំណើរចុះពិនិត្យមើលកសិដ្ឋានបណ្តុះផ្សិតអំបោះ នៅភូមិក្រសាំងដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំង កាលពីថ្ងៃទី០៤ ខែមិថុនា ឆ្នាំ២០២០។
បើតាម ម្ចាស់កសិដ្ឋានបណ្តុះផ្សិតអំបោះមួយកន្លែង នៅភូមិក្រសាំងដុះឡើង បានអោយដឹងថា កសិដ្ឋានរបស់គាត់មានរោងផ្សិតចំនួន០៣រោង ដោយ០១រោងមានកញ្ចប់ផ្សិតចំនួន៣៦ ០០០កញ្ចប់ ហើយក្នុងមួយថ្ងៃដកផ្សិតបានជាមធ្យមចំនួនពី៤០០គីឡូក្រាមទៅ៥០០គីឡូក្រាម ដោយក្នុងមួយគីឡូក្រាមតម្លៃពី៦០០០រៀល ទៅ៧០០០រៀល ។ ដោយឡែក ចំពោះទីផ្សារលក់ផ្សិតអំបោះរបស់ គឺលក់ទៅផ្សារម៉ាក្រូ(ភ្នំពេញ) ផ្សារនាគមាស និងផ្សារដើមគរជាដើម ។
ម្ចាស់កសិដ្ឋាន បានអោយដឹងទៀតថា ទីផ្សារផ្សិតអំបោះនេះមិនខ្វះទេ មានតែផលិតផ្សិតលក់អោយទីផ្សារមិនទាន់ទៀតផង៕
