ប្រជា​ពល​រដ្ឋប្រមាណ​៤០០​គ្រួសារ​នៅ​ខេត្តស្ទឹង​ត្រែង​ ទទួលបាន​អណ្ដូង​ទឹក​​ពី​មូល​នីធិ​អណ្តូង​ទឹកស្អាត​មាតា​បិតា​​សម្តេច​តេជោ និង​សម្តេចកិត្តិព្រឹទ្ធបណ្ឌិត

ដើម្បីបន្តដោះស្រាយ​តម្រូវការ​ទឹកស្អាត​ប្រើប្រាស់​នៅតាម​ទីជនបទ​ដាច់ស្រ​យាល​ នៅថ្ងៃទី​ ២៨-២៩ ​ខែកុម្ភ​: ឆ្នាំ២០​២០ លោក​ជំទាវ​​ ពេជ ចន្ទមុន្នី ប្រធាន​មូល​នីធិ​អណ្តូង​ទឹកស្អាត​មាតាបិតា​សម្តេច​តេជោ និង​សម្តេចកិត្តិ​ព្រឹទ្ធ​បណ្ឌិត រួមទាំង​ក្រុម​ការងារ​ បានប្រគល់អណ្តូ​ងទឹកស្អាត​ចំនួន ២០ ជូនដល់​គ្រួសារ​យោធិន និងប្រជាពលរ​ដ្ឋខ្វះ​ខាតទឹក​ប្រើប្រាស់​ជិត៤០០គ្រួសារ នៅ​ស្រុក​​សៀមប៉ាង និង​ស្រុក​សេសាន ខេត្តស្ទឹង​ត្រែង ដែលជា​តំបន់ឆ្ងាយដាច់ស្រយាល ប្រឈម​នឹងកង្វះទឹក ក្នុង​រដូ​វប្រាំង ក្នុងនោះ មានអណ្តូងរបស់អ្នកឧកញ៉ាព្រឹទ្ឋមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី និងឧបាសក លីន គ្រី ចំនួន៥ និង អណ្តូង​ អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងឧបាសិកា ឌី ប៉ុក ចំនួន ១៥អណ្តូង។

លោកជំទាវ​ ពេជ ​ចន្ទមុន្នី  ​បាន​ឱ្យ​ដឹង​ថា ​អណ្តូង​ទឹកស្អាត​ទាំងនេះ​ គឺជា​អំណោយ​មូល​នីធិ របស់​មាតា​បិតា​បង្កើត ​សម្តេចតេជោ ហ៊ុន ​សែន​ និងសម្តេចកិត្តិព្រឹទ្ឋបណ្ឌិត ដែល​លោក​តែង​តែ​គិត​គូរ​ពី​សុខភាព​របស់​ប្រជា​ពលរដ្ឋរស់​នៅ​តាម​ទី​ជន​បទ​ដាច់​ស្រ​យាល​​ដែលខ្វះទឹកស្អាតប្រើប្រាស់នៅរដូវប្រាំង។

ប្រជាពលរដ្ឋដែលរស់នៅស្រុកទាំងពីរខាងលើ បានឱ្យដឹងថា តំបន់នេះនៅពេលដែលរដូវប្រាំងចូលមកដល់ គឺខ្វះ​ខាត​ទឹក​ប្រើ​ប្រាស់​ខ្លាំងណាស់ ដែលតម្រូវឱ្យពួកគាត់ទៅរកទឹកនៅកន្លែងឆ្ងាយៗ រឺទិញទឹកគេ។ ម្យ៉ាង​ទៀត​ទឹក​ទាំង​នោះ​គ្មាន​សុវត្ថិភាព​ទៀត​​ផង។ ប្រជាពលរដ្ឋ បាន​ថ្លែង​អំណរគុណ​យ៉ាងជ្រាល​ជ្រៅ​ ចំពោះសម្ដេច តេជោហ៊ុន សែន និងសម្ដេចកិតិ្តព្រឹទ្ធបណ្ឌិត ព្រមទាំងលោកជំទាវ​ ពេជ ចន្ទមុន្នី  ដែលបានយកចិត្តទុកដាក់ចំពោះ​សុខទុក្ខក្នុងការរស់​នៅរ​បស់​ពួក​គាត់។ឆ្លៀតក្នុងឱកាស​ប្រគល់អណ្តូង​ទឹកជូន​ប្រជាពល​រដ្ឋនេះ​ដែរ លោកជំទាវ​ ប្រធានមូល​នីធិ បាន​ដឹក​នាំ​​ក្រុម​គ្រូពេទ្យ​​ស្ម័គ្រ​ចិត្ត​យុវជន​​សម្តេចតេជោ(TYDA) ពិនិត្យ ពិគ្រោះ និងផ្តល់ថ្នាំ​ព្យាបាល​ជំងឺស្រាលៗ ជូនប្រជាពលរដ្ឋដោយឥតគិតថ្លៃផងដែរ។ លើស​ពីនោះទៀតបើ​មានប្រជាពលរដ្ឋ​ដែលមានជម្ងឺធ្ងន់ធ្ងរ លោកស្រីប្រធានមូលនីធិ និងបញ្ជូន​មក​ព្យាបាល​​នៅ​ភ្នំពេញ​​ក្រោម​ការឧបត្ថម្ភ​ដល់ថ្លៃថ្លាប្រកប​ដោយទឹកចិត្តសប្បុរសធម៌​របស់​សម្តេចតេជោ ហ៊ុន សែន និង​សម្តេច​កិតិ្តព្រឹទ្ធ​បណ្ឌិត។

គួរបញ្ជាក់ដែរថា គិតចាប់តាំងពីឆ្នាំ ២០១៣ ដល់ឆ្នាំ​២០២០នេះ មូលនីធិអណ្តូងទឹកស្អាត​មាតាបិតា​សម្តេចតេជោ ហ៊ុន សែន និងសម្តេច​កិត្តិ​ព្រឹទ្ឋបណ្ឌិត បាន​ដោះស្រាយ​បញ្ហា​ទឹក​ស្អាត ជូនប្រជាពលរដ្ឋ​រាប់ពាន់​គ្រួសារ នៅទូទាំង​ប្រទេស តាមរយៈ​​ការ​ធ្វើ​អណ្តូង​ទឹកស្អាតបានចំនួនជាង ៨០០អណ្តូងហើយ និងបានដាក់ឱ្យដំណើរការប្រើប្រាស់ ជាផ្លូវការបានជិត៦០០អណ្តូង៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង