កំពង់ឆ្នាំង ៖របាំងស្បៃមុង ចំនួន១៥កន្លែង ដែលជនខិលខូចលួចដាក់ស្ទាក់ចាប់ត្រីខុសច្បាប់ នៅក្នុងភូមិសាស្ត្រស្រុករលាប្អៀរ និងស្រុកជលគិរី ត្រូវកម្លាំងចម្រុះធ្វើការរុះរើបំផ្លាញចោល ។
លោក លី ឡា នាយខណ្ឌរដ្ឋបាលជលផល នៃមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង បានឲ្យដឹងថា នៅថ្ងៃទី៧ ខែកុម្ភៈ ឆ្នាំ២០២៤នេះ កម្លាំងចម្រុះចំនួន២២នាក់ មានកម្លាំងខណ្ឌរដ្ឋបាលជលផល មន្ត្រីអាជ្ញាធរ និងកម្លាំងសហគមន៍នេសាទ បានចុះល្បាតនៅក្នុងភូមិសាស្ត្រ ស្រុករលាប្អៀរ និងស្រុកជលគិរី ដោយបានប្រទះឃើញរបាំងស្បៃមុង ចំនួន១៥កន្លែង ប្រវែងសរុប៦០០ ម៉ែត្រ លូស្បៃមុង១៥មាត់ បង្គោល២២០ដើមត្រូវបានរុះរើបំផ្លាញចោល នៅនឹងកន្លែង និងចាក់លែងត្រីចម្រុះចំនួន៣០គីឡូក្រាម ទៅក្នុងដែនទឹកធម្មជាតិវិញ ។
លោក លី ឡា បានអំពាវដល់ប្រជានេសាទ កុំឲ្យនេសាទត្រី ដោយប្រើឧបករណ៍ ដែលច្បាប់ហាមឃាត់ ជាពិសេសឧបករណ៍ឆក់ និងរបាំងស្បៃមុង និងត្រូវចូលរួមការពារព្រៃលិចទឹកឲ្យបានគង់វង្ស សម្រាប់ជាជម្រកត្រី
ពង កូន ជាបន្តទៅទៀត ៕
