សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចទិញផ្លែមៀន ចំនួន២១តោន ដើម្បីចែកចាយ ជូនក្រុមគ្រូពេទ្យ និងអ្នកជំងឺកូវីដ១៩ ដែលកំពុងសម្រាកព្យាបាលតាមមន្ទីរពេទ្យមួយចំនួន នៅរាជធានីភ្នំពេញ។ នេះបើតាមរយៈហ្វេសបុកផេកផ្លូវការរបស់កាកបាទក្រហមកម្ពុជា នៅយប់ថ្ងៃទី១៧ ខែសីហា។
ផ្លែមៀនដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ទិញចំនួន២១តោននោះ នឹងត្រូវចែក ជូនក្រុមគ្រូពេទ្យ និងអ្នកជំងឺកូវីដ១៩ នៅមន្ទីរពេទ្យ និងកន្លែងព្យាបាលជំងឺកូវីដ១៩ចំនួន៤កន្លែង រួមមាន ទី១៖ ក្រុមគ្រូពេទ្យស័្មគ្រចិត្តសម្តេចតេជោ (TYDA) និងអ្នក ជំងឺកូវីដ ចំនួន ៦តោន ទី២៖ ក្រុមគ្រូពេទ្យ និងអ្នកជំងឺកូវីដ១៩ នៅមន្ទីរពេទ្យរុស្ស៉ី ចំនួន៥តោន ទី៣៖ ក្រុមគ្រូពេទ្យ និងអ្នកជំងឺ កូវីដ១៩ នៅមន្ទីរពេទ្យជ័យជំនះ ចំនួន៥តោន និងទី៤៖ ក្រុមគ្រូពេទ្យ និងអ្នកជំងឺកូវីដ១៩ នៅស្តាតអូឡាំពិកទីកន្លែងព្យាបាលជំងឺ កូវីដ១៩ ចំនួន៥តោន។
គួរបញ្ជាក់ថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅថ្ងៃទី១៧ ខែសីហា ក៏បានអនុញ្ញាតឱ្យ ឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង នាយករងខុទ្ទកាល័យសម្តេចតេជោ ដើម្បីប្រមូលទិញនូវកសិផលរបស់ប្រជាកសិករ គឺផ្លែមៀនប៉ៃលិន នៅតាមបណ្តាខេត្តជាប់ព្រំដែនកម្ពុជា-ថៃ ដែលកំពុងប្រឈមនឹងការនាំចេញទៅក្រៅប្រទេស ដោយសារការឆ្លងរីករាលដាលជំងឺកូវីដ-១៩។
ប្រជាពលរដ្ឋដែលកំពុងប្រឈមបញ្ហា ពាក់ព័ន្ធនឹងការនាំចេញដែលបណ្តាលមកពីការឆ្លងរីករាលដាលនៃជំងឺកូវីដ-១៩ នៅតាមព្រំដែន ប្រទេសជិត សធ្វើការទំនាក់ទំនង ទៅក្រុមការងាររបស់ នាយឧត្តមសេនីយ៍ ហ៊ីង ប៊ុនហៀង តាមរយៈលេខទំនាក់ទំនង គឺ 097 777 3737 (លោក សេង ឌីលីន)និងលេខ 088 903 7777 (លោក ស៊ុន ម៉េងហៃ) សម្រាប់ព័ត៌មានបន្ថែម ហើយកន្លែងទទួលទិញគឺនៅសាលាខេត្តបាត់ដំបង ដោយអនុវត្តចាប់ពីថ្ងៃទី១៨ ខែសីហា នេះតទៅ។
