រូប​សំណាក​នារី​ស្មូន​ឆ្នាំង ត្រូវ​សាង​សង់​ឡើង នៅ​ចំកណ្តាល​សួន​ច្បារ​ផ្លូវបំបែក​វាងក្រុង​ទី៣ ក្នុង​ស្រុក​រលា​ប្អៀរ​

កំពង់ឆ្នាំង ៖ រូបសំណាក​នារី​ស្មូនឆ្នាំង នឹងត្រូវស្ថាបនាឡើង នៅចំកណ្តាលសួនច្បារផ្លូវបំបែកវាងក្រុងទី៣ ស្ថិតក្នុងឃុំពង្រ ស្រុករលាប្អៀរ ខេត្តកំ​ពង់​ឆ្នាំង​ ។ពិធី​​ក្រុងពលីនិងបញ្ចុះបឋមសិលាសាងសង់ ត្រូវបានធ្វើឡើងនាពីព្រឹកថ្ងៃទី១ ខែតុលា ឆ្នាំ២០២០ ក្រោមអធិបតីភាពឯកឧត្តម​ឈួរ ច័ន្ទឌឿន អភិបាលខេត្តកំពង់ឆ្នាំង និង លោកជំទាវ ព្រមទាំងមានការចូលរួមពីសំណាក់លោកស្រី ប៊ន សុភី អភិបាលងរងខេត្តកំពង់ឆ្នាំង និង លោក លោកស្រី ថ្នាក់ដឹកនាំមន្រ្តីរាជាកាតាមមន្ទីរអង្គភាពជុំវិញខេត្តផងដែរ ។
មានប្រសាសន៍នៅក្នុងឱកាសនោះ ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង បានបញ្ជាក់អោយដឹងថា រូបសំ​ណាកនារី​ស្មូនឆ្នាំង​នឹង​ត្រូវ​ស្ថាបនា​ឡើង​នៅចំកណ្តាលសួនច្បារ ផ្លូវបំបែកវៀងក្នុងគម្រោងធ្វើឲ្យប្រសើរឡើងផ្លូវជាតិលេខ៥ ។ តាមរយៈនៃការអនុវត្តគម្រោងនេះ ខេត្តកំពង់ឆ្នាំង មាន​ផ្លូវ​វាង​​ក្រុងនិងទីប្រជុំជនចំនួន៣កន្លែង ទី១.គឺផ្លូវវាងទីប្រជុំជនផ្សារឧត្តុង្គ ឆ្លងកាត់ស្រុកសាមគ្គីមានជ័យ រដ្ឋបាលខេត្តកំពង់ឆ្នាំង ដាក់រូបសំណាក​ព្រះ​គោ​ព្រះកែវ ,ទី២.គឺផ្លូវវាងក្រុងកំពង់ឆ្នាំង អាជ្ញាធរខេត្តដាក់រូបសំណាកឆ្នាំង ដែលមានកំពស់១៤ម៉ែត្រ នៅចំកណ្តាលសួនច្បារ ជានិមិត្តរូបនៃខេត្តកំពង់ឆ្នាំង និង ទី៣ គឺរូបសំណាក់នារីស្មូនឆ្នាំង និមិត្តរូបទី៣នេះ គឺបានបង្ហាញអំពីស្នាដៃរបស់ស្រ្តីនៃខេត្តកំពង់ឆ្នាំង ដែល​មា​ន​ជំនាញ​ក្នុងការ​ស្មូនឆ្នាំង​ប្រកប​ដោយ​ភាព​ប៉ិនប្រសព្វ ។
ឯកឧត្តមអភិបាលខេត្ត បានបញ្ជាក់អោយដឹងទៀតថា រូបសំណាកទាំង៣នេះ ពិតជាបង្ហាញអំពីអត្តសញ្ញាណ នៃខេត្តកំពង់ឆ្នាំង ដែលជាទឹក​ដីសំបូរ​ទៅ​ដោយ​ធនធានធម្មជាតិ និង រឿងរ៉ាវប្រវតិ្តសាស្រ្តជាច្រើនផងដែរ ។
ឯកឧត្តមបន្ថែមថា ក្រោមកា​រ​ដឹកនាំរ​បស់រាជរដ្ឋាភិបាល ដែល​មានសម្តេចអគ្គមហា​សេនា​បតីតេជោហ៊ុនសែន ជានាយករដ្ឋមន្រ្តី ពីមួយដំណាក់​កាល​ទៅ​មួយ​ដំណាក់កាល ខេត្តកំពង់ឆ្នាំងកាន់តែមាន​ការអភិវឌ្ឍន៍ជាបន្តបន្ទាប់លើគ្រប់វិស័យ ស្របតាមកម្មវិធីយុទ្ធសាស្ត្រចតុកោណរបស់​រា​ជរដ្ឋាភិបាល ។ ទាក់ទាញបានអ្នកវិនិយោគិន បង្កើតការងារជូនប្រជាពលរដ្ឋ ក្រៅពីនេះខេត្តកំពង់ឆ្នាំង គឺជា​ខេត្តគោលដៅទេសចរណ៍ប្រកប​ដោយភាពទាក់ទាញ ដូច​នេះ​យើងត្រូវបន្តថែរក្សា និង អភិវឌ្ឍន៍នូវអ្វីដែលមានស្រាប់ អោយ​កាន់តែមាន​ការរីកចម្រើន​បន្ថែមទៀត​ ដើម្បីចូលរួមកាត់​បន្ថយ​ភាពក្រីក្រ​របស់​ប្រជា​ពលរដ្ឋ ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង