ពោធិ៍សាត់ ៖ ដោយសារភ្លើងប្រចណ្ឌបុរសម្នាក់បានទាញពូថៅ កាប់ប្រពន្ធ ជាច្រើនកន្លែង បណ្តាលឱ្យស្លាប់ក្នុងថ្លុកឈាម រួចគេចខ្លួនបាត់ ។
ហេតុការណ៍នេះ បានកើតឡើងនៅវេលាម៉ោង៩និង៣០នាទីព្រឹក ថ្ងៃទី៣១ ខែឧសភា ឆ្នាំ២០២១នេះ នៅចំណុចភូមិស្ថានីយ៍ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ ។
ប្រភពនៅកន្លែងកើតហេតុបានឱ្យដឹងថា ករណីឃាតកម្មខាងលើ បង្កឡើងដោយជនសង្ស័យ (ជាប្ដី) ឈ្មោះឡូញ ធារ៉ា អាយុ៣៨ឆ្នាំ រស់នៅភូមិ-សង្កាត់កើតហេតុខាងលើ បានប្រើពូថៅ កាប់ទៅលើជនរងគ្រោះ (ជាប្រពន្ធ) ឈ្មោះស៊ុ ចាន់នី អាយុ៣០ឆ្នាំ ជនជាតិខ្មែរ ត្រូវចំក្បាល ត្រូវដៃទាំងសង្ខាង និង ដងខ្លួនជាច្រើនកន្លែង បណ្ដាលឱ្យស្លាប់ក្នុងថ្លុកឈាម នៅនឹងកន្លែងរួចគេចខ្លួនបាត់ស្រមោល ។
ចំពោះមូលហេតុដែលឈានដល់ករណីឃាតកម្មខាងលើ ត្រូវបានគេនិយាយតតគ្នាថា មកពីភ្លើងប្រច័ណ្ឌ ។ បច្ចុប្បន្នសាកសពស្ត្រីរងគ្រោះ ត្រូវបានសមត្ថកិច្ចជំនាញធ្វើកោសលវិច្ច័យ រួចប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី ៕
